Jetisý oblysynyń fılarmonııasyna Dánesh Raqyshevtiń esimi berildi

<p>Jetisý oblystyq fılarmonııasy endi Qazaqstannyń halyq ártisi, ánshi-kompozıtor Dánesh Raqyshevtyń esimimen atalatyn boldy. Sondaı-aq Taldyqorǵandaǵy óner sańlaǵy turǵan úıge eskertkish taqta ornatyldy, dep habarlaıdy&nbsp;<a href="https://kaz.inform.kz/" target="_blank" rel="noopener">Kazinform.</a></p>

Jetisýlyq jeztańdaı ánshi Dánesh Raqyshev qazaq mýzykasynyń qorjynyna 150-den astam Ásettiń ánderin, halyq ánderin, basqa da halyq kompozıtorlary men qyrǵyz ánderin, Qazaqstan kompozıtorlarynyń jáne 100-ge jýyq óz ánin asqan sheberlikpen oryndap, qaldyrdy. 1986 jyly «Qazaq SSR-niń halyq ártisi» joǵarǵy ataǵyna ıe bolǵan. Jetisýda Dánesh Raqyshevtiń esimi ánshilik-oryndaýshylyq mektebin qalyptastyrýshy tulǵa retinde tarıhta qaldy. 1990 jyldary Taldyqorǵandaǵy qazaq mektep-ınternatynda jáne Jetisý memlekettik ýnıversıteti mýzyka fakýltetinde óz klasyn ashyp, talapty balalar men jastardy ánshilikke baýlydy.

Foto: Jetisý oblysy ákiminiń baspasóz qyzmeti

 

Jetisý oblysynyń fılarmonııasyna Dánesh Raqyshevtiń esiminiń berilýine oraı halyq ártisi turǵan úıge eskertkish taqta ornatylyp, «Jetisý dúldúli» atty merekelik kontsert uıymdastyryldy.

«Bul mereıli kún Jetisý jurtshylyǵynyń ǵana emes, tutas qazaq óneriniń qýanyshy dep bilemin. Qazaqtyń án ónerine úlken úles qosqan Dánesh aǵamyz turǵan qasıetti shańyraqqa jetisýlyqtar taqta ornatyp otyr. Men sańlaq ánshini eń alǵash ret óner baıqaýynda kórdim, onda baıqaýǵa qazylyq etýge keldi. Sol shaqta tanystym, adamgershilige, talantyna tánti boldym. Búginde Dánesh aǵanyń shákirtteri – ónerde óz oryndaryn tapqan belgili ánshiler. Dánesh Raqyshevtiń esimi qazaq ónerimen birge jasaı beredi», – dedi Halyq ártisi Ramazan Stamǵazıev.