Jetisý oblysynyń Almaly aýylynda mádenıet úıi, dárigerlik ambýlatorııa men sport kesheni salynady

<p>TALDYQORǴAN. KAZINFORM - Qaratal aýdanynyń Almaly aýylynda úsh birdeı áleýmettik nysan salynady. Atap aıtqanda, mádenıet úıi, blokty-modýldi dárigerlik ambýlatorııa jáne sport kesheni boı kótermek. Bul týraly búgin Qaratal aýdanyna barǵan jumys saparynda Jetisý oblysynyń ákimi Beıbit Isabaev Almaly aýylynyń turǵyndarymen kezdesýi kezinde aıtty, - dep habarlaıdy Jetisý oblysy ákiminiń baspasóz qyzmeti.</p>

Foto: Jetisý oblysynyń ákimdigi

Báıshegir aýyldyq okrýginde 1200 adam tursa, okrýg ortalyǵy Almaly aýylynda 800-den astam turǵyn bar. Aýyldaǵy eski mádenıet úıi 2000 jyldan beri qoldanýǵa jaramsyz kúıde turǵan bolatyn. Bul tozyǵy jetken nysan súrilip, aýylda halyqtyń ótinishi negizinde bıylǵy jyly blokty-modýldy konstrýktsııadan mádenıet úıi turǵyzyla bastady. Endi aýyl turǵyndary mádenı is-sharalar ótkizýge, al balalar men jastar túrli úıirmelerge qatysýǵa múmkindik alady. Beıbit Isabaev aýyl turǵyndarymen áńgimelesý barysynda mádenıet úıiniń qurylysy kelesi jyly jazda aıaqtalatynyn aıtty.

Sonymen qatar aýyldyq aýrýhananyń janynan bir aýysymda 50 adam qabyldaı alatyn dárigerlik ambýlatorııa boı kóteredi. Qazirgi kezde konkýrstyń qorytyndysy shyǵyp, qurylysyn júrgizetin merdiger uıym anyqtaldy.

Foto: Jetisý oblysynyń ákimdigi

Jańa dárigerlik ambýlatorııanyń salynatynyn aýyldyq aýrýhananyń mamandary qýana quptaǵan.

- Eldi mekendegi aýyldyq aýrýhananyń ǵımaraty 1980 jyly salynǵan. Oǵan tek aǵymdaǵy jóndeý jumystary júrgizilgen edi. Ǵımarattyń ózi eskirip, materıaldyq-tehnıkalyq bazasy toza bastaǵandyqtan, janynan jańa statsıonar dárigerlik ambýlatorııa salý týraly sheshim qabyldanǵanyn estip qýandyq. Endi qazirgi aýrýhana ǵımaraty statsıonar retinde, al jańa nysan aýyldyq emhana retinde qoldanylady. Qazir aýrýhanada 14 medıtsınalyq personal jumys isteıdi, - deıdi Almaly aýyldyq aýrýhanasynyń meńgerýshisi Maqpal Sultan.

Foto: Jetýs oblysynyń ákimdigi

Sol sııaqty óńir basshysy kelesi jyly «Úshtóbe – Almaly - Kópbirlik» avtojolynyń 145-shi shaqyrymyndaǵy Almaly kópiri de jasalatynyn jetkizdi.

- Aýyldaryńyzda mektep pen aýrýhana bar, endi zamaýanı dárigerlik ambýlatorııa men mádenıet úıi salynady. Ótken jyly Kópbirlik aýylyna, bıyl Almalyǵa jedel járdem kóligin berdik. Sonymen qatar aýyldyń ishki kóshelerin jóndeýge, jaryqtandyrýǵa kóńil bólemiz. Oǵan qosa sizderdiń ótinishterińizge oraı tıptik jobamen halyq sanyna sáıkes sport keshenin salamyz dep sheshtik. Osylaısha eń aldymen aýyldyń ınfraqurylymyn jaqsarttyq, ekinshi kezekte qajetti áleýmettik nysandar salynýda, endigi kezekte shaǵyn jáne orta bıznesti jáne aýyl sharýashylyǵyn damytýǵa erekshe nazar aýdarý kerek. Ol úshin «Aýyl amanaty» sııaqty memlekettik baǵdarlamalardyń qoldaý múmkindikterin keńinen paıdalaný qajet, - dedi oblys ákimi Beıbit Isabaev.