Jetisý oblysynda jyl basynan beri esirtkige qatysty 65 qylmys anyqtaldy
Esirtkini satýda azamat «OLX» baǵdarlamasyn qoldanǵan. Kýrerlik qyzmet usynystary degen jeleýmen jastardy jumysqa alǵan. Dál osyndaı qylmys Telegram jelisinde de anyqtalyp, jasyryn esirtki satýmen aınalysatyn 56 chat joıylǵan. Júrgizilgen jumystarǵa sáıkes, 34 keliden artyq esirtki túrleri tárkilendi.
«Esirtki qylmysyna qarsy is-qımyl basqarmasynyń qyzmetkerlerimen Tekeli qalasy, Veselaıa polıana kóshesi, № 44 úı meken-jaıyndaǵy esirtki zerthanasynyń ornalasqan jeri anyqtaldy. Onda Ońtústik-Qazaqstan oblysynyń turǵyndary óńirge kelip sıntetıkalyq esirtki óndirgen.Ustalǵandardyń aıtýy boıynsha «Telegram» qosymshasynan silteme taýyp, ol boıynsha hat jazysyp júrgenin, onyń barysynda belgisiz adamnan 1 kılogramm daıyn ónim úshin 1 000 AQSh dollary kóleminde aqshalaı syıaqy úshin «mefedron» esirtki zatyn daıyndaý jáne satý jóninde nusqama alǵany anyqtaldy», - dedi Jetisý oblystyq PD Esirtki qylmysyna qarsy is-qımyl basqarmasynynyń basshysy Madııar Omarov.
Sondaı-aq, qoǵamdyq oryndarda psıhotroptyq preparat qoldanǵan 4 azamat ustalǵan.
Jalpy, óńirde kámeletke tolmaǵandardy esirtkiniń zańsyz aınalymyna tartýdyń aldyn alý máselelerine erekshe nazar aýdarylýda. Ol úshin basqarma stýdenttermen profılaktıkalyq kezdesýler uıymdastyrady. Máselen, sońǵy 5 aıda jalpy bilim berý, orta arnaýly jáne joǵary oqý oryndarynda 346 dáris ótkizilipti.
Buǵan deıin qoǵam qaıratkeri Ámirjan Qosanovtyń stýdentterdiń esirtki paıdalanatyndyǵyn ne paıdalanbaıtyndyǵyna test ótkizýdi usynǵany jaıly jazǵan edik.