Jetisý oblysynda jyl basynan beri kámeletke tolmaǵan 105 qyz júkti bolyp qalǵan
Oqý oqyp, erteń maman bolady dep úmit artqan órimdeı qyzdar erte «Ana» atanyp otyr. Oblystyq densaýlyq saqtaý basqarmasy mamandarynyń málimetinshe, joǵaryda atalǵan 105-tiń 69-y bosanyp alsa, on qyzda túsik bolǵan. Al, 26 jasóspirimniń aı-kúni jaqyndap otyr.
«Erte júkti bolǵan qyzdardyń 80 paıyzy 17 jasta. Ekeýinen basqasynyń barlyǵy tolyq otbasynan shyqqan. Anasy da, ákesi de bar. Eki qyz mektep oqýshysy. Bosanyp alǵan qyzdar qazir enelerimen, joldastarymen birge turyp jatyr. Biz de óz tarapymyzdan kámeletke jasy tolmaǵandarǵa túsindirme jumystaryn ótkizip, erte júktiliktiń aldyn alýmen kúresip jatyrmyz. Áıelder isteri jáne otbasylyq demografııalyq saıasat jónindegi ulttyq komıssııanyń bastamasymen halyqtyń reprodýktıvti densaýlyǵyn qorǵaýǵa arnalǵan ashyq esik kúni Jetisý oblysy boıynsha 16 medıtsınalyq uıymda ótkizildi. Onda jalpy 3 myńnan asa qyz-kelinshekterdi qabyldadyq. Onyń 632-si jasóspirimder boldy», — deıdi Jetisý oblystyq densaýlyq saqtaý basqarmasy basshysynyń orynbasary Janetta Nurmanbetova.
Bilim berý uıymdarynda kámeletke tolmaǵandar arasynda zorlyq-zombylyq, jynystyq qatynastyń oryn alý sebepterin jedel anyqtaý jáne shuǵyl psıhologııalyq keńes kórsetetin jumys toby qurylǵan. Sondaı-aq, basqarmadaǵylar erte júktiliktiń aldyn alý maqsatynda psıhologtar men mektep medbıkeleri saýalnamalar men jeke áńgimelesýler únemi júrgizip otyratynyn aıtady. Biraq, ata-analardyń deni balalarymen bul taqyrypta ashyq sóılesýge qarsylyq bildiretin kórinedi. Mamandar erte júktiliktiń aldyn alý úshin jynystyq tárbıe 12 jastan bastap júrgizilse deıdi. Aıta keteıik, ótken jyly oblystaǵy mektep oqýshylary arasynda erte júktilik boıynsha 5 fakt tirkelgen bolatyn.
«Bul problemanyń týyndaý sebepteriniń biri áleýmettik jeliden be dep oılaımyn. Óıtkeni, balasynyń gadjetten ne kórip júrgenin únemi qadaǵalap otyrǵan eshkim joq. Bul úlken másele. Urpaq tárbıesimen qazir tıktok, ınstagramm aınalysyp jatyr. Áke-sheshe balany tek materıaldyq qundylyqtarmen ǵana qamtamasyz etip otyr. Sodan keıin ata-analar osy taqyrypta balalarymen ashyq sóılese almaıdy. Mentalıtetke kelmeıdi dep jatady, negizi jynystyq tárbıe berilse balalar óz shekarasyn túsinip, ony buzýǵa eshkimge jol bermes edi. Ony eseıe kele ortasynan, aınalasynan estip, bilip alady deıtin shyǵar. Ol qate túsinik. Erteń balanyń ersi qylyǵynan uıalmaý úshin, búgin onymen uıalmaı áńgimelesý kerek», — deıdi Taldyqorǵan qalasyndaǵy № 14 orta mekteptiń pedogog-psıhology Qanǵabylova Nazym.
Eske salaıyq buǵan deıin Taldyqorǵanda 6 jasar qyzdy zorlamaq bolǵan er adamnyń izdestirilip jatqany týraly jazǵanbyz.