Jetisý oblysynda tutas bir aýyl teri tsehynyń ıisine tóze almaı shaǵym aıtty

<p>TALDYQORǴAN. KAZINFORM — Jetisý oblysy Kóksý aýdany Balpyq bı aýylynyń turǵyndary qystyń aıazy men jazdyń aptabynda esik-terezeni qymtap otyrýǵa májbúr. Munyń bárine mal terisin óńdeıtin zaýyt sebep. </p>

«Qabyldanǵan teri aptalap sasyp jatady» degen kópshilik taza aýanyń armanǵa aınalǵanyn aıtady. Tunshyqqan turǵandar oıyn balalaryn qysy-jazy úıde ustap otyrýǵa májbúr. Al eń qıyny — ekologııaǵa tóngen qater. Óıtkeni, azamattardyń sózine sensek, teri jýǵan sý kanal arqyly aǵyp, Kóksý ózenine quıatyn kórinedi. Saldarynan aımaqtaǵy demalys oryndary da maldyń óleksesine aınalǵan.

Foto: Mıras Anıtov

«Buryndary úıge qonaq kelgende baqshada demalýshy edik. Qazir dalada júrýdiń ózi qıyn. Iis kıimińe sińedi. Al, aýlada kir jaıa almaısyń. Óıtkeni ıis sińgen kıim tipti kııýge jaramaı qalady. Kóksý aýdanynyń ortalyǵynda turamyz. Ortalyq degen aty ǵana. Qarańyzdarshy, kóshemizde tazalyq degen atymen joq! Maldyń óleksesi men ishek qarny aqqan soń qazir ózende balyq joq. Jazda óz óńirimizde demalýdy umyttyq», — deıdi aýyl turǵyny Qaırat Janǵazınov.

Aýlasynda appaq qurt órip júrgen óndiris orny basshysyna turǵyndar talaı márte eskertý jasapty. Tipti, ákimdikke de shaǵym aıtyp kelgen. Alaıda esh nátıje baıqalmaıdy. Al, kásip ashyp, nápáqasyn tapqysy kelgen azamat jumys bastamas buryn resmı organdardan ruqsat aldyq, bári zańdy dep otyr.

«Kórshilerden ruqsat almadyq, biraq surap, aıttyq. Osy jerden kásip ashaıyq biz, bala-shaǵa baǵyp otyrmyz dedik. Bul kisiler «sasytpaı, tazalap tursańyzdar boldy» degen. Eshqandaı sasyq joq qoı bul jerde. Shamaly ǵana jaǵymsyz ıis bar shyǵar, teri ǵoı endi», — deıdi kásipker Qýań Turaı.

Jurttyń mazasyn alǵan jaıttan jergilikti ákimdik habardar. Olar «kásipkerdiń jumysyna birjaqty tosqaýyl qoıa almaıtyndyqtaryn aıtady. Degenmen, tıisti mekemelerge aryz jazylypty.

Foto: Mıras Anıtov

«Ol - jekemenshik jer. Jekemenshik jerinde ol teri qabyldaı beredi. Jeke kásipker retinde tirkelgen. Mamandar bar, vestansa bar, bárimiz juma kúni kelip, bárin tekserip, talapqa saı ma, aýyldan qansha shaqyrym bolý kerek, soǵan sáıkes, qaǵazdaryn beredi, tekseredi. Jabatyn nárseni jabady», - deıdi Balpyq bı aýyl okrýginiń ákimi Tólegen Qojabekov.

Aýasy buzylyp, alqymnan alǵanda amalsyz bas kóterýge májbúr bolǵan kóksýlyqtar atalǵan nysandy shalǵaıǵa kóshirmeıinshe tynysh tappaımyz dep otyr. Ázirge azamattar talabynyń qashan oryndalary belgisiz.