Jetisý oblysynda týberkýlez juqtyrǵan naýqas sany kóbeıdi

<p>Bıyl elimiz boıynsha týberkýlez taıaqshasyn juqtyrǵandardyń sany 7 myń adamnan asqan. Qurt aýrýymen aýyrǵandar sany Jetisý oblysynda da azaımaı otyr, dep habarlaıdy Kazinform.</p>

Álem medıtsınasy áleýmettik aýrý sanatyna jatqyzatyn týberkýlez dertin tolyq aýyzdyqtaý áli kúnge múmkin bolmaı otyr. Koh taıaqshasyn jańadan juqtyrýshylar legi de kóbeıip keledi eken.

Dárigerlerdiń málimetinshe, jyl basynan beri Jetisý oblysynda aýrýdyń alǵashqy belgileri 224 adamnan anyqtalǵan.

- Óńirde bıyl týberkýlez juqtyrýdyń 224 jaǵdaıy tirkeldi. Syrqattaný deńgeıi ótken jyldyń sáıkes kezeńimen salystyrǵanda 11 jaǵdaıǵa kóbeıdi. Qazirgi ýaqytta oblys boıynsha epıdemııalyq jaǵdaı turaqty bolǵanymen, ınfektsııanyń taralýyna yqpal etetin kóptegen máseleler bar. Mysaly, týberkýlezdiń dárige tózimdi túrleriniń joǵary úlesi, halyqtyń sanıtarlyq saýattylyǵynyń jetkiliksizdigi jáne adamnyń óz densaýlyǵyna nemquraıly qaraýy aýrýdy jyldam juqtyrýǵa yqpal etýi múmkin, - deıdi Jetisý oblysy Densaýlyq saqtaý basqarmasy basshysynyń orynbasary Janeta Nurmanbetova.

Mamannyń aıtýynsha, aǵzadaǵy ımmýndyq júıesi álsiregen adamdar týberkýlezdi juqtyrý qaýpine kóbirek ushyraıdy. Aýrýdyń damýy birneshe aıǵa deıin bilinbeı sozylady. Jalpy, týberkýlezdiń juqpaly túrimen aýyrǵan bir naýqas oqshaýlanbasa, ol 10-15 adamǵa ınfektsııa juqtyrýy múmkin eken.