Jetisý oblysynda Táýelsizdik esimdi jetkinshek turady

<p>2011 jyly eldiń eń ulyq merekesin atap ótip jatqanda dúnıege kelgen úıdiń tuńǵyshyn ata-anasy Táýelsizdik dep ataǵan. Jetisý oblysynyń Panfılov aýdanynda turatyn jetkinshek 7-synypta oqıdy, dep habarlaıdy <a href="Kazinform" target="_blank" rel="noopener">Kazinform.</a></p>

Táýelsizdik — ozat oqýshy ári synyp starostasy. Mekteptegi is-sharalarǵa belsendi qatysyp, árdaıym alda júretin ol bolashaqta elge eńbegi sińetin azamat bolýdy armandaıdy.

Tuńǵyshyna erekshe esim bergen Táýelsizdiktiń ákesi muny egemendiktiń qurmetine arnaıy qoıǵanyn aıtady. 

«Jeltoqsan oqıǵasynda el táýelsizdigi úshin bizdiń aýdannyń eki azamaty qurban boldy. Sonyń biri Lázzat Asanova bizdiń týǵan aýylymyzdyń turǵyny edi. Erbol da bizdiń aýdannyń azamaty. Ekeýi de jastyq shaǵyna qaramaı el egemendigi jolynda janyn berdi. Osyndaı erlik umytylmaýy tıis. Balama Táýelsizdik atyn egemendiktiń qadirin bilip, árdaıym esinen shyǵarmaý maqsatynda arnaıy qoıdym», - deıdi Táýelsizdiktiń ákesi Batyrbek Núsipov.

Foto: Panfılov aýdanynyń ákimdigi

Merekege oraı elde joq esimdi arqalaǵan jetkinshekke Panfılov aýdanynyń ákimi Marat Saǵymbek arnaıy syı kórsetip, ata-analaryna alǵysyn bildirdi.

«Bizdiń Jarkent óńiriniń turǵyndary táýelsizdik úshin erekshe úles qosty. Eki bozdaǵymyz osy jolda qurban boldy. Bundaı qasiret tek bizdiń aýdanda ǵana boldy. Endi mine, Táýelsizdik esimin arqalaǵan balaqaı da tek bizdiń aýdanda ǵana ósip jatyr. Bul bizdiń aýdannyń Táýelsizdikke degen erekshe qurmeti», - deıdi ákim.

Núsipovtar áýleti — aýyldaǵy úlgili, jurtqa tanymal otbasy. Jeke sharýashylyqpen aınalysatyn áke men sheshe úsh balany tárbıelep otyr. Olar balalarynyń bolashaǵy jarqyn, elge paıdasy tıetin tanymal azamat bolýyn armandaıdy.