Jetisý oblysynda robot sot oryndaýshylar jumys isteıdi

<p>TALDYQORǴAN. KAZINFORM - Jetisý oblysynda robot sot oryndaýshylar jumysqa kiristi. Olar 4 aıda azamattardan 15 mıllıon teńge óndirip alǵan. Al qarapaıym halyq 4 mln teńge únemdegen.&nbsp;</p>

Elimizde bıyl tamyz aıynan bastap Ádilet mınıstrligi ázirlegen «robot – sot oryndaýshy» jobasy iske qosylyp, ońaılatylǵan is júrgizý bastalǵany belgili. Bul joba azamattarǵa aıyppul somasynyń 3%-dan 25%-ǵa deıingi mólsherdegi jeke sot oryndaýshysynyń qyzmeti úshin qosymsha aqysyz aıyppuldardy tóleýge múmkindik beredi.

«Robot sot oryndaýshy qalaı jumys isteıtinin bylaı túsindireıin. Ýákiletti organ aqparattyq júıeni ıntegratsııalaý arqyly ákimshilik quqyqbuzýshylyq týraly qaýlyny atqarýshylyq is júrgizýdiń memlekettik avtomattandyrylǵan aqparattyq júıesine jiberedi. Budan ári aýmaqtyq Ádilet organy atqarýshylyq is júrgizýdiń memlekettik avtomattandyrylǵan aqparattyq júıesiniń derekter bazasynda ońaılatylǵan óndiristi avtomatty túrde qozǵaıdy. Ońaılatylǵan óndiris bastalǵannan keıin azamattar 1414-ten SMS habarlama alady jáne EGovMobile-da ońaılatylǵan óndiristi qozǵaý týraly egjeı-tegjeıli aqparatpen push-habarlama alady», - deıdi Jetisý oblystyq Ádilet departamentiniń basshysy Erjan Erkenov. 

Robot sot oryndaýshynyń oryndaýyndaǵy is júrgizý 30 kún ishinde júzege asady. Ol aıaqtalǵannan keıin atqarýshylyq is júrgizý oryndalmaǵan jaǵdaıda jeke sot oryndaýshylaryna májbúrlep oryndaýǵa beriledi. Onda boryshkerler jeke sot oryndaýshysynyń qyzmetine qosymsha aqy tóleýi tıis.

Eske salaıyq osyǵan deıin Jetisý oblysynda 72,5 mln teńgeniń gaz qubyryn urlaǵan kúdiktilerdiń ustalǵanyn jazǵanbyz.