Jetisý oblysynda naýqastarǵa tıesili dári-dármek jyldar boıy qorapta jatqan

<p>TALDYQORǴAN. KAZINFORM — Apatty ǵımaratta shashylyp jatqan preparattar men medıtsınalyq apparattar Tekeli qalasyndaǵy aýrýhanaǵa tıesili eken. Áleýmettik jelige taraǵan beınejazbadan ǵımarattyń qabyrǵalary opyrylyp turǵanyn, onda túrli dári-dármektiń shashylyp jatqany anyq baıqalady. Vıdeo avtorynyń sózinshe, onda jaramdylyq merzimi ótpegen dáriler de bar.</p>

Beınejazbadan arnaıy tizimge engen «Tramadol», qutydaǵy ampıtsıllın, koronavırýs kezinde qoldanatyn arnaıy jabdyqtardy baıqaýǵa bolady. Sondaı-aq, jaramdylyq merzimi ótken dári-dármekter de bar kórinedi. 

«Mine ampıtsıllın preparatyn kórip turmyz, jaramdylyq merzimi 2025 jyldyń qarasha aıyna deıin eken. Qarańyzdarshy qanshama ampıtsılın jatyr. Osy dárilerdi satyp alý úshin adamdar jyldar boıy jumys istep aqsha tabady. Al munda ol eshkimge kerek emes bolyp jatyr», — deıdi vıdeo avtory.

Al Jetisý oblystyq densaýlyq saqtaý basqarmasy qyzmettik tekseris bastalǵanyn habarlady.

«Jetisý oblysynyń Densaýlyq saqtaý basqarmasy «Tekeli qalalyq aýrýhanasynyń ShJQ MKK» ákimshiliginiń dárilik zattar men medıtsınalyq maqsattaǵy buıymdardy tıisinshe saqtamaǵany týraly osy jarııalanymǵa qatysty qyzmettik tergeýdiń bastalǵany týraly habarlaıdy. Pandemııa kezinde (Covid19) dári-dármekter men medıtsınalyq maqsattaǵy buıymdardyń negizgi bóligi qoldanyldy. Qyzmettik tergeý aıaqtalǵannan keıin tolyq aqparat beriletin bolady», — deıdi Jetisý oblystyq densaýlyq saqtaý basqarmasynyń baspasóz qyzmeti.

Eske salaıyq buǵan deıin Taldyqorǵanda tuńǵysh ret jiti leıkoz qaterli isigine shaldyqqan naýqastyń jazylyp shyqqanyn jazǵanbyz.