Jetisý oblysynda medıtsına qyzmetkerleri azamattardyń quqyǵyn buzǵan

<p>TALDYQORǴAN. KAZINFORM - Prokýrorlardyń málimetinshe,&nbsp; medıtsınalyq uıymdar 3-4 toptaǵy onkologııalyq dıspanserlik esepte turǵan&nbsp; naýqastardy&nbsp; medıtsınalyq- áleýmettik saraptamaǵa&nbsp; jibermegen. Osylaısha 18 adam múgedektigin rásimdeı almaı,&nbsp; áleýmettik járdemaqydan qaǵylǵan.</p>

Konstıtýtsııanyń 28-baby memlekettiń múgedektik mártebesi bar azamattarǵa eń tómengi jalaqy mólsherinde tólem alýǵa kepildik beredi. Osy zańdy eskermeı azamattardyń áleýmettik qamsyzdandyrý quqyǵyn buzǵany úshin 3 medıtsına qyzmetkeri jaýapkershilikke tartyldy.

«Prokýrorlyq qadaǵalaý aktisine sáıkes barlyq buzýshylyqtar joıyldy, barlyq adamdar medıtsınalyq-áleýmettik saraptamaǵa jiberildi. Olardyń ekeýi áleýmettik tólemderdi taǵaıyndaý arqyly múgedektik mártebesin aldy», - deıdi Jetisý oblystyq prokýratýrasynyń baspasóz qyzmeti.

Eske sala ketelik buǵan deıin qazaqstandyqtardyń nelikten óz elinde emes, shetelde onkologııalyq terapııa men hırýrgııalyq emdelgendi qalaıtynyn jazǵan bolatynbyz.