Jetisý oblysynda matematıka pániniń muǵalimi 20 jylǵa sottaldy

<p>TALDYQORǴAN. KAZINFORM &mdash; Matematıka pániniń muǵalimi jynystyq sıpattaǵy zorlyq-zombylyq jasaǵany úshin kináli dep tanyldy.</p>

Jetisý oblysy qylmystyq ister jónindegi mamandandyrylǵan aýdanaralyq sotynda kámeletke tolmaǵan qyzǵa zorlyq-zombylyq jasady dep aıyptalǵan 39 jastaǵy er adamǵa qatysty is qaraldy.

Jabyq rejımde ótken sot otyrysynda memlekettik aıyptaýshy J. esimdi er adamǵa ómir boıyna pedagogıkalyq jáne kámeletke tolmaǵandarmen jumys isteýge baılanysty laýazymdardy atqarýǵa tyıym salyp, 20 jylǵa bas bostandyǵynan aıyrýdy surady.

Qorǵaýshy tarap óz kezeginde sottalýshynyń áreketin Qylmystyq kodekstiń 121-babynyń 4-bóligi (Kámeletke tolmaǵanǵa belgili adamǵa qatysty seksýaldyq sıpattaǵy zorlyq-zombylyq áreketteri) jáne 122-babynyń 2-bóligi (Jynystyq qatynas jáne on alty jasqa tolmaǵan adammen jynystyq sıpattaǵy ózge de áreketter) boıynsha saralaýdy surady.

«J.-nyń áreketi zań boıynsha asa aýyr qylmys sanatyna jatqyzylyp, J.-nyń kinási kámeletke tolmaǵan jábirlenýshiniń, kýálardyń aıǵaqtarymen, oqıǵa bolǵan jerdi qaraý hattamasymen tolyq dáleldengen. Sot-medıtsınalyq saraptama qorytyndysy jáne istiń basqa da qujattaryna sáıkes aıǵaq berilgen», – delingen sot habarlamasynda.

Aıyptalýshy QR Qylmystyq kodeksiniń 121-babynyń 4-bóligimen kináli dep tanylyp, 20 jylǵa bas bostandyǵynan aıyryldy.

Ol jazasyn qylmystyq-atqarý júıesiniń qaýipsizdigi ortasha mekemesinde óteıdi. Sondaı-aq oǵan ómir boıyna pedagogıkalyq jáne kámeletke tolmaǵandarmen jumys isteýge baılanysty laýazymdardy atqarýǵa tyıym salyndy.

Kámeletke tolmaǵan jábirlenýshi G.-nyń zańdy ókiliniń paıdasyna bes mln teńge moraldyq shyǵyn óndirildi. 

Úkim zańdy kúshine engen joq.