Jetisý oblysynda qus atýǵa shyqqan mektep oqýshysyna oq tıdi

<p>TALDYQORǴAN. KAZINFORM — Alakól aýdanyndaǵy Kólbaı aýylynda kámeletke tolmaǵan balaǵa oq tıdi. Oqýshy qazir Taldyqorǵan qalasyndaǵy oblystyq aýrýhananyń jansaqtaý bóliminde jatyr.</p>

Jetisý oblystyq bilim basqarmasynyń málimetine súıensek, oqys oqıǵa 20 qarasha kúni keshki saǵat 17:00 shamasynda bolǵan.

Kólbaı orta mektebinde 9-10 synyp oqıtyn úsh oqýshy qus atýǵa shyqqan. Abaısyzda atylyp ketken myltyq oǵynan 2009 jylǵy bala aıaǵynan aýyr jaraqat alǵan.

— Jaraqat alǵan oqýshy jedel járdem kóligimen Qabanbaı aýylyndaǵy aýrýhanaǵa jetkizilip, ota jasalǵan (dıagnoz: ashyq jilinshiktiń oq jaraqaty). Búgingi kúnde ol Taldyqorǵan qalasyndaǵy oblystyq aýrýhananyń jansaqtaý bóliminde, jaǵdaıy birqalypty. Oqýshylar aýdandyq polıtsııada, mektepishilik profılaktıkalyq esepte tirkelmegen, — dedi oblystyq bilim basqarmasynan. 

Bul iske qatysty Jetisý oblystyq polıtsııa departamenti sotqa deıingi tergeý bastalǵanyn málimdedi. 

— Alakól aýdanynda jasóspirim janyndaǵy dosyn baıqaýsyzda myltyqpen atyp alǵan. Balalardyń biri atasyna tıesili qarýdy suraýsyz alyp ketken. Kináli oqýshy esepke alynyp, ata-anasy jaýapqa tartyldy, — delingen oblystyq polıtsııa departamenti usynǵan derekte. 

Sondaı-aq, polıtsııa qyzmetkerleri azamattarǵa qarý saqtaý, qoldaný erejelerin qatań saqtaýdy eskertedi.

Eske salaıyq, osyǵan deıin Taldyqorǵanda qoǵamdyq kólikter oqýshylarǵa toqtamaıtynyn jazǵanbyz.