Jetisý oblysynda bıylǵy on aıda ónerkásip óndirisi 3,9 paıyzǵa ósken - Prezıdent sapary

<p>ASTANA. KAZINFORM - Qasym-Jomart Toqaevqa Jetisý oblysynyń ákimi Beıbit Isabaev óńirdiń áleýmettik-ekonomıkalyq damýy týraly baıandady, dep habarlaıdy Aqordanyń baspasóz qyzmeti.</p>

Oblys ákiminiń aıtýynsha, bıylǵy І jartyjyldyqtaǵy jalpy óńirlik ónim 6,2 paıyz ósimmen 781 mıllıard teńgeni quraǵan. Al jyl aıaǵynda 7,1 paıyz ósimge qol jetkizilmek. On aıdyń qorytyndysy boıynsha qysqa merzimdi ekonomıkalyq ındıkator 112,8 paıyzdy kórsetken.

Aýyl sharýashylyǵynyń damýynda oń dınamıka bar. Sondaı-aq óndiris kólemi, ónerkásip, saýda jáne qurylys salalary ilgerileı túsken. Bıyl óńirde 247,6 myń sharshy metr turǵyn úı paıdalanýǵa berilgen. Bul byltyrǵy kórsetkishten 4,1 paıyzǵa artyq.

Memleket basshysyna jańa ınvestorlardy tartý, oblystyń ınvestıtsııalyq tartymdylyǵyn arttyrý baǵytyndaǵy jumystar jóninde esep berildi.

Jyl basynan beri 1,3 ese ósimmen 327,1 mıllıard teńge ınvestıtsııa tartylǵan. Osy rette jeke ınvestıtsııalar sany 1,6 ese ósken. Beıbit Isabaev 2024-2030 jyldarǵa arnalǵan quny 3,5 trıllıon teńge bolatyn ınvestıtsııalyq portfel qalyptastyrylǵanyn jetkizdi. Onyń aıasynda 190 joba qolǵa alynyp, 11,8 myńnan astam jumys orny ashylady. Bıyl 54,9 mıllıard teńgeni quraıtyn 48 joba iske asyrylyp jatyr.

Budan bólek, óńirdegi ónerkásip salasy týraly aıtyldy. Jetisý oblysynda 549 kásiporyn tirkelip, 30 myńnan astam adam jumyspen qamtylǵan. Bıylǵy on aıda ónerkásip óndirisi 3,9 paıyzǵa ósken.

Foto: Aqorda

Qasym-Jomart Toqaev óńirdegi tyń bastamalardy quptady. Sondaı-aq áleýmettik-ekonomıkalyq damý qarqynyn saqtap, tıisti jumystardy jalǵastyrýdy tapsyrdy.

Osyǵan deıin Qasym-Jomart Toqaevtyń Jetisý oblysyna jumys sapary «Taldyqorǵan» ındýstrııalyq aımaǵynda ornalasqan «ASMA INDUSTRIAL» óndiristik akkýmýlıator shyǵarý zaýytynyń jumysymen tanysýdan bastalǵanyn jazǵan edik.