Jetisý oblysynda basy daýǵa qalǵan aýyl ákimi jeńil jazamen qutyldy

<p>TALDYQORǴAN. KAZINFORM &mdash; Jetisý oblysynyń turǵyny, tórt balanyń anasy Aqsý aýyldyq okrýginiń ákimin túnde úıime terezeden kirip, zorlyq kórsetpek boldy dep aıyptaǵan edi. Qylmystyq is Aqsý aýdandyq sotynda qaralyp, aıyptalýshy eki azamatqa úkim shyqty.</p>

Aqsý aýdandyq soty aýyl ákimi men ákimdik qyzmetkeriniń ústinen qozǵalǵan qylmystyq isti qarady.

Olar turǵyn úıge top bolyp túngi ýaqytta zańsyz kirý jáne eldiń tynyshtyǵyn buzý baby (QK 149-babynyń 2-bóligi) boıynsha aıyptalǵan.

Sot 2024 jyldyń tamyz aıynda, túngi ýaqytta, ákim men ákimdik qyzmetkeri jábirlenýshiniń úıine asúı terezesindegi tordy alyp tastap, zańsyz kirgenin anyqtady.

Sotta jınalǵan dálelder, jábirlenýshiniń jáne kýágerlerdiń aıǵaqtary, sondaı-aq istiń basqa da materıaldary negizinde aıyptalýshylardyń kinási dáleldendi.

Atalǵan jaǵdaı jeńil dárejedegi qylmystar sanatyna jatady.

— Sottalýshylardyń buryn sottalmaǵany jáne kámeletke tolmaǵan balalarynyń bary eskerildi. Olar taǵylǵan aıyptar boıynsha kináli dep tanylyp, árqaısysyna 1 jyl merzimge bas bostandyǵyn shekteý jazasy taǵaıyndaldy. Úkim zańdy kúshine engen joq, — delingen Aqsý aýdandyq sotynyń taratqan habarlamasynda.

Aýdandyq ákimdiginiń málimetinshe sot úkimi kúshine engennen keıin Aqsý aýyldyq okrýgynyń ákimi qyzmetten bosatylady.

Eske salaıyq buǵan deıin Jetisý oblysynda aýyl ákiminiń basy daýǵa qalǵanyn jazǵanbyz.