Jetisý oblysynda balany kóligimen qaǵyp ketken júrgizýshi sottaldy

<p>TALDYQORǴAN. KAZINFORM &ndash; Jetisý oblysynda kámeletke tolmaǵan balany kóligimen qaǵyp ketken júrgizýshige qatysty sot úkimi shyqty.</p>

Jetisý oblysy Eskeldi aýdandyq sotynda abaısyzda adamnyń ólimine ákep soqqan avtomobıl basqarýshy adamnyń jol júrisi nemese kólik quraldaryn paıdalaný qaǵıdalaryn buzý faktisi boıynsha (QR QK-niń 345-babynyń 3-bóligi) qylmystyq is qaraldy.

Sot ótken jyldyń 2 qarasha kúni keshki saǵat 8 shamasynda Eskeldi aýdany Bıǵash aýylynyń Boranbaev kóshesinde avtokólikti basqarǵan sottalýshy B. sol sátte kósheni kesip ótken kámeletke tolmaǵan T.-ny qaǵyp ketkenin anyqtady. Alǵan jaraqattarynan kámeletke tolmaǵan jábirlenýshi sol jerde qaıtys bolǵan.

Prokýror 5 jyl merzimge kólik quraldaryn basqarý quqyǵynan aıyra otyryp, 2 jyl 6 aı merzimge bas bostandyǵynan aıyrý túrindegi jazany taǵaıyndaýdy surady.

Sotta sottalýshy kinásin tolyq moıyndaǵan jáne ókingen, anasy men ákesi (jábirlenýshi) ony keshirip, moraldyq jáne materıaldyq zııan tolyǵymen ótelgenin, sottalýshyǵa eshqandaı talap qoımatynyn, ony bas bostandyǵynan aıyrmaýdy surady.

«Aıyptalǵan áreketti jasaǵany úshin baptyń sanktsııasy belgili bir laýazymdardy atqarý nemese belgili bir qyzmetpen aınalysý quqyǵynan bes jylǵa deıingi merzimge aıyra otyryp, bes jylǵa deıingi merzimge bas bostandyǵynan aıyrýǵa jazalaýdy kózdeıdi.

Sot aýyrlatatyn mán-jaılardyń joqtyǵyn jáne kinásin tolyq moıyndaýyn, jasaǵan isine shyn júrekten ókinýin, alǵash ret qylmystyq quqyq buzýshylyq jasaǵanyn, moraldyq jáne materıaldyq zııannyń ornyn toltyrýyn, sottalýshynyń asyraýynda bes kámeletke tolmaǵan balanyń bolýyn, onyń úsheýi kámeletke tolmaǵanyn, olar úshin ol jalǵyz asyraýshy bolyp tabylatynyn, jaza taǵaıyndaý týraly tıisti ótinish túsken jábirlenýshilerdiń ustanymdaryn eskerip jáne bas bostandyǵynan aıyrýǵa baılanysty emes sot QK-niń 63-babyn qoldana otyryp, B.-ny Qylmystyq kodekstiń 345-babynyń 3-bóliginde kózdelgen qylmys jasaǵany úshin kináli dep tanydy jáne 5 jyl merzimge kólik quraldaryn basqarý quqyǵynan aıyra otyryp, 2 jyl 6 aı merzimge bas bostandyǵynan aıyrý túrindegi jazany taǵaıyndady», - dep habarlady Jetisý oblysy Eskeldi aýdandyq sotynyń baspasóz qyzmeti.

Úkim zańdy kúshine engen joq.