Jetisý oblysynda aýyl turǵyndary egistik jer ala almaı otyr

<p>TALDYQORǴAN. KAZINFORM — Aqsý aýdanyna qarasty Altynaryq eldimekeniniń turǵyndary uzaq jyldardan beri egistik jer surap keledi. Aıtýlarynsha, aýyldaǵy aýylsharýashylyq maqsatyndaǵy jer ıgerilmeı jatyr. Halyq osy máseleni aıtyp aýdandyq atqarýshy bılik pen quqyq qorǵaý organdaryna san márte hat joldaǵan.</p>

Altynaryq — aıadaı ǵana aýyl. 600-den asa turǵyny bar. Sanaýly ǵana adam mektep pen dárigerlik pýnkte istese, qalǵany eki qolǵa bir kúrek tappaı sandalyp júr.

Kúnkóris kózi — mal sharýashylyǵy, onyń ózinde myńǵyrǵan tórt túlik joq. Óıtkeni, shóp qymbat. Azyn-aýlaq usaq malmen jan baǵyp otyr. Jerge qolymyz jetse egin egip tirshilik jasaıtyn edik deıdi turǵyndar.

«13 jyl boldy osy aýylǵa kelin bolyp túskenime. 6 balamyz bar. Aýylda jumys joq. Eldiń malyn baǵyp kún kórip otyrmyz. Kúıeýimdi qalaǵa jumysqa jibere almaımyn. Bala-shaǵamen qalaı qalamyn? Altynaryqta aınalasatyn basqa eshteńe joq. Egin egeıik dep neshe jyldan beri jer surap kelemiz, biraq jerge jete almaı jatqan jaıymyz bar», — deıdi aýyl turǵyny Kámshat Jaqsylyqova.

Aýylda 70-ten asa turǵynda egistik jer joq eken. Al eldimekende 3 myń gektarǵa jýyq sýarmaly jer bar. Onyń basym bóligin kásipkerler jalǵa alyp otyr.

«Men osy aýyldyń týmasymyn. 56 jyl boldy osynda turǵanyma, jer joq. Aýylda tanymaıtyn bireýler júredi, ne istep júrsiń deseń „jerim bar“ deıdi. Qaı qaıdaǵy bireýler júredi. Olarda jer bar, osy jerdiń turǵylyqty adamdarynda jer joq. Jerdi jalǵa alyp otyrǵandar úkimetke ótirik málimet berip otyr. Biz seýip jatyrmyz dep. Shyn mánisinde eshteńe alyp jatqan joq. Jer jaıymen jatyr. Paıdalanyp jatqan eshkim joq. Olar alqaptan aırylǵysy kelmeıdi de, ony basqa bireýlerge jalǵa berip, sonyń arqasynda aqsha taýyp otyr», — deıdi aýyl turǵyny Tóleý Ǵalı.

Foto: Aıbek Quttybek/Kazinform

Jergilikti sheneýnikter paıdalanylmaı bos jatqan jerdiń biraz bóligin qaıtaryp alyp jatqanyn aıtady.

«Agro Holdıng Aqsý» 114 gektar jerdi 2014 jyly konkýrs arqyly alǵan bolatyn. 10 jyl ótken soń aýdan ákimine uzartý jóninde ótinish jazǵan. Ótinish qanaǵattandyrylmady. Sebebi, sońǵy úsh jyl jerdi ıgermedi. Ol jer aýdan qoryna qaıtaryldy. Bul sheshimmen kelispegen «Agro Holdıng Aqsý» basshylyǵy oblystyq jer resýrstaryn basqarý departamentine aryzdanǵan. Mekeme bizge tekseris ashyp, jalǵa alý merzimin uzartý jóninde nusqama berdi. Biz de bul sheshimmen kelispeımiz», — deıdi Aqsý aýdandyq aýylsharýashylyǵy jáne jer qatynastary bóliminiń basshysy Erlan Osmanbekov.

Jer daýy uzaqqa sozylatyn syńaıly. Degenmen atqarýshy bılik prezıdenttiń aýylsharýashylyǵy jerlerin maqsatty paıdalaný tapsyrmasyna saı egistik jerdi aýyl halqyna konkýrs arqyly berýge yqpal etemiz dep otyr.

Foto: Aıbek Quttybek/Kazinform