Alakól aýdandyq máslıhatynyń depýtaty kisi qolynan qaza tapty — BAQ

<p>ÚShARAL. KAZINFORM — Úsharal qalasyndaǵy qurylys nysandarynyń birinde er adam pyshaq jaraqatyn alyp, aýrýhanaǵa jetpeı qaıtys boldy.</p>

«Búgin Alakól aýdandyq polıtsııasyna Úsharal qalasyndaǵy qurylys nysandarynyń birinde mas adamnyń qurylysshylarǵa qoqan-loqqy kórsetkeni týraly habarlama túsken. Oqıǵa ornyna jetken tártip saqshylary 24 jastaǵy jergilikti turǵynnyń qarsylyq kórsetken azamatty pyshaqpen jaraqattap, qashyp ketkenin anyqtady. Júrek tusynan jaraqat alǵan 34 jastaǵy turǵyn „Jedel járdem“ kóliginde qaıtys bolǵan. Qylmys boıynsha kúdikti ustaldy», — dep habarlady Jetisý oblystyq polıtsııa departamentinen.

Keıbir BAQ pen áleýmettik jelilerde qaza bolǵan adam Alakól aýdandyq máslıhatynyń depýtaty Dáýren Slıamov ekeni jazyldy.

Aýdan ortalyǵyndaǵy qurylys nysandarynyń birinde qurylysshylar men ishimdik ishken adamnyń arasynda kelispeýshilik týǵany aıtylady.

Ol jumysshylardy pyshaqpen qorqytqan. Osy sátte oqıǵa ornyna kelgen máslıhat depýtaty qurylysshyǵa ara túsip, buzaqymen sózge kelgen. Ol Dáýren Slıamovqa pyshaq suǵyp alǵan.

Depýtat ońalmaı, «Jedel járdem» kóliginde jantásilim etken.