Jetisý oblysynda 2,6 trln teńgege 189 ınvestıtsııalyq joba qolǵa alyndy

<p>ASTANA. KAZINFORM &mdash; Jetisý oblysynda ınvestıtsııa tartý esebinen birqatar joba iske asyp jatyr. Tolyǵyraq oblys ákimi Beıbit Isabaev aıtyp berdi.</p>

— Oblystyń 2030 jylǵa deıingi ınvestıtsııalyq portfelinde 2,6 trln teńgege 189 joba bar. Osy arqyly 1 myńnan astam jumys ornyn qurý kózdelgen, onyń ishinde 121 joba qazir iske asyp jatyr. Ekonomıkalyq ósý, ári ınvestıtsııa tartý núkteleriniń ishinde Qorǵas jelisi men «Dostyq» stantsııasynyń mańyzy zor. Qytaımen shekaralas bul aımaqtardyń kólik-logıstıkalyq áleýeti úlken. Osy oraıda ınvestıtsııa tartý, júk legi men tranzıtti ulǵaıtý, ótkizý pýnktterin jańǵyrtý baǵytynda turaqty jumystar júrgizilip keledi, — dedi Beıbit Isabaev óńirdiń áleýmettik-ekonomıkalyq damýy týraly esep bere turyp.

Óńir basshysy usynǵan málimetke súıensek, «Qorǵas — Shyǵys qaqpasy» arnaıy ekonomıkalyq aımaqta jáne «Qorǵas» halyqaralyq ortalyǵynda quny 63,3 mlrd teńgege 2 myń jumys orny bar 27 nysan iske asyryldy.

— 2027 jyldyń sońyna deıin 1,1 trln teńgege 79 ınvestıtsııalyq jobany iske asyrý josparlanýda, ol jerde 9 myńnan astam jumys orny qurylady. Sonyń biri «Qorǵas-Shyǵys qaqpasy» arnaıy ekonomıkalyq aımaqta júk jáne jolaýshylar áýejaıy salynǵaly jatyr, — deıdi ol.

Buǵan deıin Beıbit Isabaev bıyl 11 aıda negizgi ındıkatorlar boıynsha jospar artyǵymen oryndalǵanyn málim etken edi.