Jetisý oblysy: Qapalǵa asfalt qara sýyqta tóselip jatyr

<p>TALDYQORǴAN. KAZINFORM - Aqsý aýdanyndaǵy Qapal men Kóshkental aýyldaryn jalǵaıtyn qara jol qarashanyń qara sýyǵynda salynyp jatyr. Áleýmettik jelide pikir qaldyrǵandar asfalttyń qar túskende tóselip jatqanyna narazy.</p>

Aqsý aýdanynyń turǵyndary dál osy tasjoldyń qurylysy sıyrquıymshaqqa salynyp ketkenin aıtyp talaı shaǵymdanǵan edi. Al qazir olar qarashadaǵy qarbalasqa narazy. Jol salýdy kóktemge deıin toqtatýdy suraıdy. Aýyl turǵyndary merdiger kompanııanyń qar jaýǵanyna qaramastan jantalasyp jol salyp jatqan beınejazbasyn áleýmettik jelige jarııalady. Al, jolǵa jaýapty basshylar jóndeý jumystary turaqty baqylaýda dep otyr.

«Asfalt jabyndysyn salý barysynda aýa temperatýrasy 5 gradýstan tómen bolǵan joq jáne asfalt jabyndysynyń temperatýrasy 120 gradýstan tómen bolǵan joq. Atalǵan jóndeý jumystary turaqty baqylaýda. Jumys barysynda tehnıkalyq qadaǵalaý uıymy qadaǵalaý jumystaryn júrgizýde. Oblystaǵy barlyq merdiger mekemelerge qazan aıynyń sońynda tıisti nusqama berildi, kúz kezinde asfalt jabyndysyn tóseý kezinde tehnologııalardy saqtaý, temperatýralyq rejımderdi baqylaýǵa alý máselesi boıynsha tıisti hattamalar joldandy» - dedi Jetisý oblystyq jolaýshylar kóligi jáne avtomobıl joldary basqarmasy basshysynyń orynbasary Aıdos Dosjanov.

Sondaı-aq, áleýmettik jelide kólik júrgizýshileri «Saryózek-Kóktal» tasjolyndaǵy jumystardy da synǵa aldy. Eske salaıyq buǵan deıin Jetisý oblysynyń joldary qys mezgiline qanshalyqty daıyn ekenin jazǵanbyz.