«Jetisý» áıelder komandasy Qazaqstan kýbogynyń ıegeri atandy

<p>PETROPAVL. KAZINFORM &ndash; Petropavl qalasynda voleıboldan áıelder komandalary arasynda Qazaqstan kýbogynyń oıyndary aıaqtaldy.</p>

Altyn júlde úshin «Qýanysh» (SQO) pen «Jetisý» (Taldyqorǵan) klýbtary talasty.

Azamat Esimov jattyqtyratyn alań ıelerinen jankúıerleri jeńis kútken-di. Alaıda oıyn múlde basqasha sıpatta órbip, serbııalyq maman Marko Grshıch baptaıtyn taldyqorǵandyqtar match tizginin qolǵa ala bildi. Óskemenniń «Altaıymen» birge Qazaqstan chempıondyǵyna qosa el kýbogyn utyp alǵan M.Grshıch ótken jyldyń jeltoqsanynda «Jetisý» klýbyna aýysqan edi. 

Bul joly taldyqorǵandyqtar «Qýanyshty» 3:0 (25:23, 25:21, 25:22) esebimen utyp, jeńiske jetti.
Osylaısha, «Jetisý» óz tarıhynda toǵyzynshy ret kýbokqa ıe boldy. Al serbııalyq bapker Qazaqstan tarıhynda eki klýbpen birge el kýbogyn utyp alǵan alǵashqy sheteldik maman atandy.

Óskemenniń «Bereli» Qazaqstan kýbogynyń qola júldesine qol jetkizdi. Rıshat Gılıazýtdınovtyń shákirtteri bıylǵy Qazaqstan chempıony, Asqar Shalqybekov jattyqtyratyn Túrkistannyń «Turan» komandasyn 3:1 (19:25, 25:19, 25:17, 25:19) esebimen tize búktirdi. 

Eske sala keteıik, budan buryn voleıboldan Qazaqstan kýbogynda «Jetisý» men «Qýanyshtyń» fınalǵa shyqqanyn jazǵan bolatynbyz.