Jetim balalarǵa memleket bergen páterdi jekeshelendirý quqyǵy berildi
— Turǵyn úıdiń qoljetimdiligin arttyrý maqsatynda «Baqytty otbasy», «Shańyraq» baǵdarlamalary jumys isteıdi, «Otaý» jáne «Naýryz» jańa jeńildikti ıpotekalyq baǵdarlamalary iske qosyldy, oǵan jetim balalar men ata-anasynyń qamqorlyǵynsyz qalǵan balalar qatysady. Turǵyn úı saıasatyn reformalaý týraly zańda jetim jáne ata-anasynyń qamqorlyǵynsyz qalǵan balalardyń turǵyn úıdi birinshi kezekte alý quqyǵy saqtalady.
Sondaı-aq olarǵa jáne halyqtyń basqa da áleýmettik osal toptaryna jaldamaly turǵyn úıdiń jalpy kóleminiń keminde 70 paıyzynyn berý kózdelgen. Sonymen qatar memlekettik turǵyn úı qorynan berilgen turǵyn úı-jaılardy jekeshelendirý quqyǵy (2024 jylǵy 22 qarashada № 138-VIII qabyldandy) berildi, — dedi Premer-Mınıstr.
Úkimet basshysynyń dereginshe, budan basqa, jetim balalar men ata-anasynyń qamqorlyǵynsyz qalǵan balalar úshin Astana, Almaty jáne Shymkent qalalarynda kezekke turǵan kezde úsh jyl tirkeýde bolý jónindegi qoldanystaǵy talap joıyldy.
— Bıylǵy 25 sáýirden bastap «Naýryz» ıpotekalyq baǵdarlamasyna ótinim qabyldaý bastaldy. Osy baǵdarlamaǵa sáıkes halyqtyń áleýmettik jaǵynan osal toptary, onyń ishinde jetim balalar úshin kredıt boıynsha mólsherleme 7 paıyzdy quraıdy. Memleket basshysynyń tapsyrmasy boıynsha osy jyldan bastap «Meıirim» qaıyrymdylyq aktsııasy iske asyrylýda. Onyń aıasynda árbir jetim balaǵa mamandyq tańdaýda, jumysqa ornalasýda jáne turǵyn úımen qamtamasyz etýde kómek kórsetetin «patronattyq» uıym bekitiledi. Osylaısha, jetim balalar men ata-anasynyń qamqorlyǵynsyz qalǵan balalardyń turǵyn úı máselelerin sheshý boıynsha júıeli sharalar qabyldanýda, — dedi Oljas Bektenov.
Buǵan deıin bıyl jetim jáne ata-anasynyń qamqorlyǵynsyz qalǵan 1 599 bala baspanaly bolǵanyn jazǵan edik.