Jetim balalardy qabyldaıtyn kásibı otbasy ınstıtýty engiziledi
«Balany qabyldap alýshy ata-analardyń balany asyraý, tárbıeleý jáne oqytý boıynsha júktelgen mindetterdiń oryndalýyn baqylaýdy qorǵanshylyq jáne qamqorshylyq organdary júzege asyrady, sonymen birge qabyldap alýshy ata-analarǵa balalardyń ómiri men tárbıesine qajetti qalypty jaǵdaı jasaýǵa kómek kórsetedi. Zańǵa sáıkes, qabyldap alýshy ata-analar bala on segiz jasqa tolǵanǵa deıin qorǵanshylyq jáne qamqorshylyq organdaryna qabyldap alynǵan balanyń turmys jaǵdaıy, bilimi, tárbıesi jáne densaýlyǵy týraly esep berýge mindetti», - dep atap ótedi Úkimet basshysynyń orynbasary jaýabynda.
Onyń atap ótýinshe, jetim balalardy otbasyna ornalastyrý máseleleri boıynsha qorǵanshylyq jáne qamqorshylyq organdarynyń jáne jetim balalarǵa arnalǵan uıymdardyń qyzmetin úılestirý men biryńǵaı baqylaýdy Oqý-aǵartý mınıstrliginiń Balalardyń quqyqtaryn qorǵaý komıteti júzege asyrady.
«Qazirgi tańda Parlament Májilisinde qaralyp jatqan «Bilim berý jáne bala quqyqtaryn qorǵaý máseleleri boıynsha keıbir zańnamalyq aktilerge ózgerister men tolyqtyrýlar engizý týraly» zań jobasy aıasynda jetim balalardy otbasyǵa ornalastyrýdyń balamalyq nysany retinde qabyldaýshy kásibı otbasy ınstıtýty engiziledi. Zań jobasyna sáıkes, qabyldaýshy kásibı otbasylar psıhologııalyq daıyndyqtan, qorǵanshylyq jáne qamqorshylyq organdarynan akkredıtatsııadan ótip, balalar anyqtalǵannan keıin táýliktiń kez kelgen ýaqytynda densaýlyq jaǵdaıyna qaramastan birden qabyldaıdy», - dedi Tamara Dúısenova.
Premer-mınıstr orynbasarynyń paıymynsha, qabyldaýshy kásibı otbasylardy engizý balalardy qoldaý ortalyqtaryndaǵy tárbıelenýshiler sanynyń tómendeýine yqpal etip, olardyń qyzmeti balalardy tárbıeleý men kútip baǵýdan kásibı otbasylardy súıemeldeýge jáne osy otbasylarǵa berilgen balalardy baqylaýǵa baǵyttalady.