Jetim balalardy azaptaǵan emshi oqıǵasy: birqatar qyzmetker jazalandy
Qalalyq bilim basqarmasy qamqorshylyq jáne qorǵanshylyq bóliminiń basshysy Nurdáýlet Abylaevtyń aıtýynsha, pedagogter asyrandy balalardyń qıyn jaǵdaıda ómir súrip jatqanyn buǵan deıin bilgen jáne der kezinde dabyl qaqpaǵan. Osy áreketi úshin mektep dırektorynyń tárbıe isi jónindegi orynbasary, jasóspirim balanyń synyp jetekshisi, pedagog psıholog, áleýmettik pedagogke qatań eskertý túrindegi tártiptik shara qoldanylǵan.
«Asyrap alýǵa berilgen bala mektepke nemese balabaqshaǵa barsa, biz ondaǵy mamandarmen kúndelikti baılanystamyz. Olar qandaı bar jaıttardy baıqasa, dereý bizge habar berýi kerek. Jasóspirim bala ómirindegi qıyndyqtary týraly mektepke birneshe aı buryn aıtqan. Alaıda mektep bizden jasyrǵan. Qazir bilim basqarmasy tarapynan mektep dırektoryn arnaıy bappen jumystan bosatý máselesi qaralyp jatyr», - dedi Nurdáýlet Abylaev.
Bólim basshysy Shymkenttegi balalar úıi men Astana, Almaty jáne Óskemendegi bóbekter úıiniń tárbıelenýshileri respýblıka boıynsha balalardy asyrap alýǵa nıetti úmitkerler bazasy arqyly tańdap alynǵanyn aıtty. Shymkenttik emshi men onyń áıeli 6 balanyń barlyǵyn patronattyq tárbıege alǵan, keıin onyń ekeýin sot sheshimimen zań aıasynda asyrap alǵan. Qalǵan tórteýi qamqorlyqtarynda qala bergen. Nurdáýlet Abylaev qorǵanshylyq qyzmetkerleri bekitilgen talap boıynsha bul balalar turatyn otbasyǵa baryp, tekserý jumystaryn júrgizgenin alǵa tartty.
«Memlekettik qorǵanshylyq jáne qamqorshylyq jónindegi fýnktsııalaryn júzege asyrý qaǵıdalaryn bekitý týraly Úkimettiń №382 qaýlysy bar. Soǵan sáıkes biz 6 aıda bir ret bala qamqorlyqqa berilgen mekenjaıǵa baryp, tekserý jumystaryn jasaımyz. Bizdiń qyzmetkerler byltyr qazan aıynda bul mekenjaıǵa barǵan. Ol kezde úlken bala úıde bolmaǵan, qalǵan balalardyń kıimderi bútin, syrttaı qaraǵanda dene jaraqattary baıqalmaǵan. Biz belgili bir shaǵym túspese jáne jaýapty arnaıy organ ókilderinsiz olardyń kıimin sheship, tekserý júrgize almaımyz», - dedi ol.
Arnaıy komıssııa akt toltyryp, ógeı áke tarapynan jaýyzdyq kórdi delingen balalardy 13 aqpanda (seısenbi kúni - avt.) bul otbasynan alyp ketken. Onyń ekeýi kámeletke tolmaǵandardy beıimdeý ortalyǵyna, qalǵan tórteýi bóbekter úıine ornalastyrylǵan. Sondaı-aq bólim basshysy balalardyń jaǵdaıy týraly habardy juma kúni (9 aqpanda - avt.) estigen, biraq ol kúni jumys aptasynyń sońy bolǵan soń, baryp úlgermegenin aıtyp otyr.
Bilim basqarmasy atalǵan oqıǵaǵa qatysty arnaıy baspasóz máslıhatyn uıymdastyryp, sol kezde barlyq suraqqa jaýap beremiz dep ýáde etti.
Qalalyq densaýlyq saqtaý basqarmasyndaǵylar balalar medıtsınalyq tekserýden ótken kezde denelerinde uryp-soǵý belgileri, kóptegen kógerý, jara, syzat jáne kishkentaı tyrtyqtar bolǵanyn aıtty.
«Olarǵa der kezinde medıtsınalyq emdik sharalar taǵaıyndaldy. Búgingi tańda túrli dárýmender berilip, emdik massajdar jasalyp jatyr. Olarmen psıholog mamandary da jumys istep jatyr. Bóbekter úıindegi búldirshinder kúndelikti montessorı sabaqtaryna qatysady. Qazirgi tańda olar salmaq qosyp, jaǵdaıy jaqsardy. Denderi saý», - dedi densaýlyq basqarmasyndaǵylar.
Buǵan deıin Balalar ombýdsmeniniń Shymkent qalalyq ókili Janneta Jazyqbaeva Kazinform tilshisine bergen suhbatynda balalardy asyrap alǵan emshi osydan 10 jyl buryn adam emdep otyryp, bir áıeldi óltirip alǵanyn aıtqan bolatyn. Keıin «psıhıkalyq aýytqýy bar» degen anyqtamamen jazadan qutylyp ketken. Bul týraly polıtsııaǵa jaýap berý kezinde emshiniń inisi baıqaýsyzda aıtyp qalǵan kórinedi.
Sondaı-aq, Janneta Jazyqbaeva shymkenttik emshi qazirgi tańda Almatydaǵy psıhdıspanserde jatqanyn aıtty.
Qalalyq Polıtsııa departamenti qoǵamdyq rezonans týdyrǵan oqıǵa boıynsha kúdiktiniń buǵan deıin isti bolǵany ne bolmaǵany týraly málimet bermedi. Onyń ústinen Qylmystyq istiń 110-baby (Qınaý) jáne 140-baby (Kámeletke tolmaǵan balalardy tárbıeleý jónindegi mindetterdi oryndamaý) boıynsha is qozǵalyp, qazir ýaqytsha ızolıatorynda qamaýda ekenin málimdedi. Atalǵan is boıynsha kúdikti - tek bir adam. Onyń áıeliniń ústinen is qozǵalmaǵan.
Іsti júrgizgen tergeýshi tergep-tekserý jumystary aıaqtalyp, prokýratýraǵa joldanǵanyn aıtty.
Qalalyq sot baspasóz qyzmetiniń málimetinshe, qylmystyq is osy apta ishinde sotqa kelip túsý kerek.
Balalaryna jaýyzdyq tanytty degen emshiniń ótkeni men jalpy minez-qulqy týraly bilý úshin kórshilerimen tildesýge tyrystyq. Olar balalar ózge búldirshinder sekildi kóshege oınaýǵa shyqpaıtynyn, jalpy bul otbasy kórshilerimen aralaspaıtynyn aıtty.
«Shyny kerek, ol kisimen aralaspaımyz. Táýipkershiligi bar ǵoı, adam qabyldaıdy. Biraq qazir eshkim kelmeı qoıdy. Ózi de kórinbeıdi... Negizi biz onymen aralaspaımyz. Balalaryn esik qaqpasynan shyǵarmaıdy. Tek úlken balasy sabaqqa baryp keletin», - dedi kórshileri.
Eske salsaq, biz buǵan deıin Shymkentte jergilikti tanymal emshiniń 6 balany asyrap alyp, olarǵa ıt pen mysyq etin bergenin, úsh jyldan beri azaptap kelgenin jazǵan bolatynbyz.
Keıinirek emshi týraly tyń derek shyqty.