Jetisýlyqtar qazaq ertegileriniń qundylyqtaryn jańǵyrtýda

ASTANA. QazAqparat - Jetisýlyqtar qazaq ertegileri qundylyqtaryn nasıhattaýdy qolǵa aldy, dep habarlaıdy QazAqparat tilshisi.

Elbasy N.Á.Nazarbaevtyń «Bolashaqqa baǵdar: rýhanı jańǵyrý» maqalasy aıasynda  Almaty oblysynyń ÚEU Konsaltıng ortalyǵy áleýmettik ıdeıalar men jobalar jármeńkesin uıymdastyrdy. Jármeńkede úzdik bolyp  «Qýyrshaq teatry»  jobasy tanyldy. Atalmysh joba  umyt bolyp bara jatqan qazaq ertegileriniń  qundylyqtaryn jańǵyrtý, jańartý maqsatynda júzege asyrylýda. Bul týraly Óńirlik kommýnıkatsııalar qyzmeti alańynda  «Músheltoı» balalar men jasóspirimder klýbynyń jetekshisi Qydyrbaeva Danııa málimdedi.

«Músheltoı» balalar men jasóspirimder klýby 2006 jyldan bastap jumys istep keledi. Onyń maqsaty balalardyń bos ýaqytyn tıimdi uıymdastyrý. Qazirgi tańda qýyrshaq teatrynyń qorjynynda 10-ǵa jýyq ertegiler bar. Klýb jetekshisinyń aıtýynsha ár qoıylatyn qýyrshaqtar qoıylymyna erekshe daıyndyq pen ynta kerek ekendigin baıandady.

«Bizdiń klýb tek qoıylymdar qoıýmen shektelmeıdi. Sonymen qatar, qaıyrymdylyq sharalarymen de aınalysady. Máselen, aptasyna bir ret aýrýhanadaǵy balalardyń hal-jaǵdaıyn bilip, kóńilderin túrli qoıylymdarmen kóterip qaıtamyz», - dedi joba jetekshisi.

Aıta keteıik, konferentsııa sońy «Aldar kóse» ertegisiniń qoıylymymen jalǵasty.