Jetisýlyq otbasy 8 qarııany qamqorlyǵyna aldy

TALDYQORǴAN. QazAqparat - Jetisýlyq otbasy 8 qarııany qamqorlyǵyna aldy, - dep habarlaıdy QazAqparat tilshisi.

Іle aýdanynyń turǵyny Sanııam Mýhamedsadykova ómiri qıyn jaǵdaıda turǵan qarttarǵa kómek qolyn sozdy.

Onyń aıtýynsha, ol adamdar úlken, meıirimdi otbasynyń bir múshesine aınalǵan. Olardyń ár qaısysyna erekshe kútim men qamqorlyq kerek deıdi.
«6 jyl buryn men kóshedegi oryndyqta táýliktep otyrǵan qarııany kórdim. Janyna óte shyǵýǵa dátim barmady. Artynsha óz úıime alyp keldim. Ol bizben birge 4 jyl turdy. Sosyn ózi quralpas janmen bas qosty, biraq biz áli kúnge aralasyp turamyz. Mine osylaısha men úlken kisilerge qamqorlyq kórsete bastadym»,-deıdi Sanııam.
Sanııamnyń peıilin joldasy da qoldaǵan. Sondyqtan keıipkerimiz óziniń jan-jary týraly zor yqylas pen rızashylyqpen aıtady. Olar birge zeınetkerlerge qamqorlyq tanytyp, bir-birine súıeý bolyp júr.
Aıta keteıik, erli-zaıyptylardyń 2 uly bar. «Uıada ne kórseń, ushqanda sony ilersiń» demekshi, balalarda ata-analaryna qarap, janashyrlyq pen meıirimdilik sezimin boılaryna sińirýde.