Jetisýlyq kópbalaly ana ekotýrızmdi aýylda damytyp jatyr

JETІSÝ OBLYSY. QazAqparat – Búgingi kúni týrızm salasy jaqsy damyp keledi. Sonyń ishinde ekotýrızm tanymal bola bastady, onda adamdar qorshaǵan ortany saqtaý úshin jaıly qonaqúılerden, avtokólikterden jáne órkenıettiń basqa da artyqshylyqtarynan bas tartady. Qazaqstannyń ekologııalyq týrızmin damytýǵa úles qosyp júrgen qyz-kelinshekter óte kóp. Solardyń biri jetisýlyq Ásem Aýǵanbaeva, dep habarlaıdy QazAqparat tilshisi.

Osydan bir jyl buryn 36 jastaǵy Ásem Aýǵanbaeva Taldyqorǵan qalasynan 180 shaqyrym jerde ornalasqan Basshı aýylynan qonaq úı ashty.

«Joldasym ekeýmiz aýyldan qonaq úı ashýdy burynan armandaıtynbyz. Aldymyzǵa maqsat qoıyp edik. Ókinishke oraı, eki jyl buryn kúıeýim qaıtys bolyp ketti», - dedi Ásem Aýǵanbaeva.

Keıipkerimizdiń aıtýynsha, joldasynan aıyrylyp qalǵan soń jeke qonaq úı ashý týraly ıdeıasyn týystary men jaqyn dostary qoldap, kómektesken.

« Meniń mamandyǵym - feldsher. Eki qyz, eki ul tárbıelep otyrmyn. Úlkenim - 14 jasta. «Kámeletke tolmaǵan balalary bar jesir áıel kásipkerlikpen aınalysa almaıdy» degender de boldy. Biraq men balalarymdy ósirip, er jetkizemin. Ekotýrızmi damytýǵa óz úlesimdi qosamyn. Balalarym maǵan úlken qoldaý kórsetýde. Sol maǵan kúsh- jiger beredi, alǵa qaraı jeteleıdi», - deıdi ol.

2021 jyly Ásem aýyl kásipkerlerine erekshe qorǵalatyn tabıǵı aýmaqtar mańynda óz isin ashý jáne damytý úshin qarjylandyrýdy qarastyratyn «Eko Damý» nesıe baǵdarlamasy týraly bildi. Aıta keteıik, Qazaqstanda jobany Birikken Ulttar Uıymynyń Damý Baǵdarlamasy (BUUDB) júzege asyrady.

«9 mln teńge nesıe alyp, eki kıiz úı, qajetti jıhazdar, ydys-aıaq pen turmystyq tehnıka satyp aldym. Jaldamaly úıdiń aýlasyna kıiz úı tigýge kómektesken týǵan-týystarym men qamqor jandardyń qoldaýynyń arqasynda men bıznesimdi bastadym», – deıdi keıipkerimiz.

Ásemniń ulttyq naqyshtaǵy qonaq úıi «Altyn-Emel» ulttyq parkiniń janynda ornalasqan.

«Kıiz úıdi tańdaǵanda, eń aldymen, olardyń ekologııalyq tazalyǵyna mán berdim. Taza aǵashtan jasalǵan. Іshin ulttyq naqyshta bezendirdik. Ydystardy sheberge tapsyrys berip arnaıy jasattym. Olardyń barlyǵy ekologııalyq taza materıaldan jasalǵan, qorshaǵan ortaǵa zııany joq», - dep bólisti Ásem.

Kásibin jańa bastaǵan Ásemniń aıtýynsha, týrısterge barlyq jaǵdaı jasalǵan.

« Demalýshylardyń basym bóligi Almaty, Taldyqorǵan jáne jaqyn mańdaǵy eldi mekenderdiń turǵyny. Sonymen qatar Germanııa, Túrkııa jáne Ýkraınadan kelgen týrıster de qazaq mádenıetine erekshe qyzyǵýshylyq tanytyp jatyr. Qonaqtaryma qazaqtyń naǵyz qonaqjaılyǵyn kórsetemin. Aldaǵy ýaqytta aýyl turǵyndaryn jumyspen qamtýdy jlosparlap otyrmyn, - dep túıindedi áńgimesin keıipkerimiz.