Jetisýlyq kásipker jasaǵan sabyn Qytaıda suranysqa ıe

TALDYQORǴAN. QazAqparat – «Bir aýyl – bir ónim» jobasy fınalısteriniń biri – jetisýlyq Nurjánet Erdáýlet úı sharýashylyǵynda sheberhana uıymdastyrdy. Ol saýmal, qymyz, aıran, bal, janýar maıynan ata-baba ádisi boıynsha sabyn shyǵarady, dep habarlaıdy QazAqparat tilshisi.

«Sabyn jasaýdyń ejelgi ádisin ájemnen úırendim. Biz Qytaıdan Qazaqstanǵa kóshken kezde bul ádisti zamanaýı túrde jandandyrýdy sheshtim. Sabynǵa hosh ıis, tús berip, pishindi tańdadym», - deıdi ol.

Jetisý oblysy kásipkerler palatasynyń tóraǵasy Dáýren Ońalbaevtyń aıtýynsha, kásipker keńes alý úshin ótken jyly palataǵa júgingen. Kásipkerlikti damytý ortalyǵynda oǵan qajetti kómek pen qoldaý kórsetilgen. Qazirgi ýaqytta kásipker Aqsý aýdanynda is bastap, kosmetıkalyq sabyn shyǵarýmen shuǵyldanady. Bıyl ol «Qorǵas» ShYHO halyqaralyq kórmesine qatyspaq.

«Sabyn tek bizdiń elde ǵana emes, elden tys jerlerde de suranysqa ıe. Ónimderim birden satylymǵa shyǵyp, endi Qytaı Halyq Respýblıkasynan da tapsyrystar kelip túsip jatyr», - deıdi Nurjánet Erdáýlet.

Endi kásipker bıznesti keńeıtýdi josparlap otyr, bul jergilikti turǵyndardy jumyspen qamtýǵa múmkindik beredi.