Jetisýda «Táýelsizdik urpaqtary» grant ıegerleri anyqtaldy

JETІSÝ. QazAqparat – 12 tamyz – Halyqaralyq jastar kúni qarsańynda Jetisý oblysynda «Táýelsizdik urpaqtary» grant ıegerleri marapattaldy, dep habarlady QazAqparat.

2021 jyly Táýelsizdigimizdiń 30 jyldyq mereıtoıy qarsańynda Memleket basshysy Qasym-Jomart Toqaev jastarmen kezdesýde «Táýelsizdik urpaqtary – jańa Qazaqstannyń basty sımvoly» dep, jastarǵa úlken senim artqan bolatyn. Sol jyldan bastap Memleket basshysy taǵaıyndaǵan «Táýelsizdik urpaqtary» granty júzege asyrylyp, jastardyń jigerli bastamalaryna qoldaý kórsetilip keledi.

Bıyl Jetisý oblysy ákiminiń qoldaýymen alǵash ret «Táýelsizdik urpaqtary» grantyna baıqaý jarııalanyp, mádenıet, ǵylym, bıznes, medıa jáne ІT salalary boıynsha 100-ge jýyq joba qabyldandy. Sonyń ishinde 10 joba qoldaý tapty.

Ár jeńimpazǵa 3 000 000 teńge kóleminde sertıfıkat tabystaldy. Bul jobalar bir jyldyń ishinde júzege asyrylady.