Jetisýda gaz tartý quny 370 myńnan 170 myń teńgege tómendedi - Bas prokýratýra

TALDYQORǴAN. QazAqparat - Jetisý oblysy prokýratýrasynyń bastamasymen engizilgen Jol kartasyn iske asyrý kezinde Kóksý aýdany Balpyq bı aýylynda gazdy qosý qunyn 370 myńnan 170 myń teńgege tómendetýge múmkindik týdy, dep habarlaıdy QazAqparat.

Vedomstvonyń málimetinshe, Muqry aýylynda ótkizgish qubyr tartylyp, 151 úı tabıǵı gazǵa qosyldy. Aýdan ortalyǵynda balalar alańdaryn abattandyrý aıaqtaldy.

«Halyqpen kezdesýde bizge dál qazir halyqty ne tolǵandyratynyn bildik. Sondyqtan oblys ákimdigimen birigip Jol kartasyn bekittik, onda turǵyndar aıtqan máselelerdi sheshý merzimderi kórsetilgen», - dedi oblys prokýrory Madııar Basshybaev.

Jol kartasy aýdandyq aýqymda áleýmettik-ekonomıkalyq sıpattaǵy máselelerdi sheshý jónindegi is-sharalardy, sondaı-aq jekelegen tulǵalardyń jeke máselelerin qamtıdy.

Jol kartasy is-sharalarynyń oryndalýyn baqylaýdy jergilikti atqarýshy, memlekettik jáne quqyq qorǵaý organdarynyń basshylarynan turatyn Vedomstvoaralyq jumys toby júzege asyrady. Mundaı tájirıbeniń tıimdiligi qazirdiń ózinde oń nátıje berdi. Mysaly, Sarqan aýdanynyń Qazybaev aýylynda medıtsınalyq pýnkt bolmaǵan, kórsetilgen máseleni Jol kartasyna kosqan soń aýdan ákimdigimen blokty-modýldik pýnkt ornatýǵa bıýdjettik ótinim qorǵalǵan jáne ony ornalastyrý 2023 jylǵa josparlanǵan.