Jetisýda balalardyń qatysýymen 100-den astam kólik apaty tirkeldi
Jyl basynan beri balalardyń qatysýymen 101 jol-kólik oqıǵasy tirkelip, 125 adam túrli dene jaraqatyn alyp, ókinishke oraı 20 adam qaza tapty. Sońǵy eki jaǵdaı Panfılov aýdanynda, bireýi Taldyqorǵan qalasynda oryn aldy.
«8 qazan kúni Almaly aýylynda Kamaz júrgizýshisi joldyń júris bóligin kesip ótip bara jatqan 10 jastaǵy balany qaǵyp ketken. Bala baqytymyzǵa oraı,aman qaldy. Qazirgi tańda dárigerlerdiń baqylaýynda. Dál osy kúni Jarkent qalasynda 10 jastaǵy velosıpedshi Mazda 323 kóliginiń astyna túsip, aýyr jaraqatpen aýrýhanaǵa tústi. Osyǵan uqsas derek 4 qazan kúni Taldyqorǵanda tirkeldi. Toyota kóliginiń 50 jastaǵy júrgizýshisi óz kóliginde 7 jasar qyzdy jaraqattaǵan», - dep jazdy aımaqtaǵy polıtsııa departamentinen.
Árbir fakti boıynsha qajetti saraptamalar taǵaıyndalyp, qylmystyq is qozǵalady. Balalardyń qatysýymen bolǵan barlyq jol-kólik oqıǵalardy Oblystyq polıtsııa departamenti erekshe baqylaýǵa aldy. Júrgizýshilerdiń kinási nemese kinásizdigi tergeý sheńberinde anyqtalatyn bolady.
«Balalardy joldarda durys minez-qulyqqa úıretý erte jastan bastalýy kerek. Osylaısha balalardy jolda qaýipsiz júris-turys erejelerine úıretý aýyr zardaptar men onyń apatqa ushyraý múmkindigin azaıtýy múmkin. Balany buǵan sendire alatyn jalǵyz adam – ata-ana», – dep atap ótti Jetisý oblysty PD bastyǵy Atyǵaı Arystanov.