Jetisýda áli 857 myń gektar aýyl sharýashylyǵy jeri paıdalanylmaıdy - Premer

TALDYQORǴAN. QazAqparat. Taldyqorǵanda QR Premer-Mınıstri Álıhan Smaıylovtyń tóraǵalyǵymen ótken keńeste Jetisý oblysynyń odan ári áleýmettik-ekonomıkalyq damý máseleleri qaraldy, dep hbarlaıdy QazAqparat.

Premer-Mınıstr óz sózinde Memleket basshysynyń Saılaýaldy baǵdarlamasyn oryndaý aıasynda aldaǵy jyldary respýblıkanyń aýyldyq aımaqtary men agroónerkásip sektoryn damytý máselelerine basymdyq beriletinin atap ótti.

Onyń ishinde aýyl turǵyndarynyń tabysy men ómir súrý sapasyn arttyrý jóninde sharalar qabyldanady.
Úkimet basshysynyń aıtýynsha, oblys ákimdigi Ekologııa mınıstrligimen birlesip, ırrıgatsııalyq jelilerdi sapaly jańǵyrtyp, sý obektilerin ýaqytyly paıdalanýǵa berýi qajet. Sondaı-aq paıdalanylmaǵan jerlerdi memleket menshigine qaıtarý áli de ózekti másele bolyp otyr.
«Jergilikti atqarýshy organdar júrgizip jatqan jumystarǵa qaramastan, oblysta áli 857 myń gektar aýyl sharýashylyǵy jeri paıdalanylmaıdy. Al halyqtyń jaıylymdyq jerlerge degen qajettiligi 680 myń gektardan asady. Sondyqtan aýyldyq eldi mekenderdiń mańynda jerlerdi sol aýyl turǵyndaryna mal jaıýǵa berý joldaryn pysyqtaý kerek. Bul baǵyttaǵy jumysty kúsheıtý qajet», - dedi Álıhan Smaıylov.
Injenerlik ınfraqurylym boıynsha Úkimet basshysy qoldanystaǵy káriz jelileriniń tozý deńgeıi 58%-ǵa jetkenin, bul rette ákimdik tarapynan osy baǵyttaǵy jumysty jandandyrý qajettigin atap ótti.
Álıhan Smaıylov sheshimin tabýdy qajet etetin birqatar áleýmettik máselege nazar aýdardy. Máselen, oblysta bes myńnan astam bala 69 beıimdelgen mektepte oqıdy, taǵy bir mektep apattyq jaǵdaıda bolsa, 26 mektep saman kirpishten turǵyzylǵan. Sonymen qatar Úkimet basshysy «Jaıly mektep» ulttyq jobasyn iske asyrý oqýshy oryndarynyń tapshylyǵy máselesin sheshýge múmkindik beretinin atap ótti
Atap aıtqanda, 2026 jylǵa deıin óńirde jańa 10 mektep ashý josparlanyp otyr. Bul maqsatqa respýblıkalyq bıýdjetten 55 mlrd teńge qarastyrylǵan.
«Sondaı-aq Qarjy mınıstrliginiń sybaılas jemqorlardyń qarajaty esebinen qurylǵan bıýdjetten tys qory bar. Osy qarajat esebinen de qosymsha mektepter salynatyn bolady», - dedi Premer-Mınıstr.