Jetisýda ákim orynbasary júgerisin ótkize almaǵan sharýalardyń problemasyna aýyl ákimderin kinálady

TALDYQORǴAN. QazAqparat - Jetisý oblysynda aýyl sharýashylyǵy salasyna jaýapty ákim orynbasary Álibek Jaqanbaev júgerisin ótkize almaǵan sharýalardyń problemasyna jergilikti ákimdikti kinálady, dep habarlaıdy QazAqparat tilshisi.

Álibek Jaqanbaev sharýalardyń der kezinde ónimin ótkize almaýy - túsindirme jumysynyń jetkiliksiz júrgizilýiniń nátıjesi dep baǵalady.

«Panfılov aýdany Basqunshy aýylynyń sharýashylyqtary kúzde júgerini osy aýdandaǵy Jarkent krahmal-sirne zaýytyna kılogrammyn 120 teńgeden ótkizbeı, kóktemde baǵasy 80 teńgege deıin túskendikten, ótkize almaı narazylyq shyǵaryp jatyr. Bul sharýashylyqtar bir jaǵynan baǵadan utylsa, ekinshi jaǵynan zaýytqa ótkizgeni úshin bıýdjetten tólenetin 6 teńge sýbsıdııadan qaǵylyp otyr. Bul negizinen aýyldyq okrýg ákimderiniń sharýashylyqtarmen túsindirme jumysyn durys júrgizbeýiniń nátıjesi dep bilemin», - dedi Jetisý oblysy ákiminiń orynbasary Álibek Jaqanbaev óńir basshysynyń qatysýymen ótken keńeste.

Aıta keteıik, byltyr Jetisý oblysynda júgeri, qant qyzylshasy, maıly daqyldar men qaraqumyq ónimderin zaýytqa ótkizgeni úshin bıýdjetten 2,7 mlrd teńge sýbsıdııa tólengen.

Esterińizge sala keteıik, Jetisý oblysyndaǵy Panfılov aýdanynyń sharýalary byltyrǵy ónimderin ótkize almaı jatqanyn habarlaǵan bolatynbyz.

Osylaısha dıqanshylardyń 2 myń tonnadan asa júgerisi dalada jatyr.

Al sharýalardyń ónimdi ótkize almaýyna sebep - baǵa arzandap ketken.