Jetisýda 140 bala tárbıelenip jatqan balabaqshanyń ashanasynan ishek taıaqshalary tabyldy

TALDYQORǴAN. QazAqparat - Jetisý oblysy Qabanbaı aýylynda ata-analar mektepke deıingi mekemedegi tamaqtyń sapasyna alańdaýly ekenin aıtyp, balabaqsha ashanasyn tekserýdi surady. Osyǵan oraı Alakól aýdandyq sanıtarııalyq-epıdemıologııalyq baqylaý basqarmasyna jazbasha aryz kelip túsken, dep habarlaıdy QazAqparat oblystyq sanıtarııalyq-epıdemıologııalyq baqylaý basqarmasynyń baspasóz qyzmetine silteme jasap.

«Qýanysh 2» balabaqshasy ata-analarynyń aıtýynsha, balalarǵa merzimi ótip ketken jáne ıisi jaǵymsyz tartylǵan et beriledi.

Bul jaǵdaı birneshe ret qaıtalanǵan.

Másele bul ǵana emes, balabaqsha aýmaǵynda antısanıtarııalyq jaǵdaı da oryn alǵan.

Tereze aldyndaǵy shań men ájethanadaǵy taraqan mektepke deıingi mekemege kelgen aýyl turǵyndaryn shoshytyp otyr.

Balabaqshaǵa Alakól aýdandyq sanıtarııalyq-epıdemıologııalyq baqylaý basqarmasynyń jáne ulttyq saraptama ortalyǵynyń mamandary keldi.

Olar zerthanalyq synama alyp, 24 shildede jospardan tys tekseris bastady.

Jetisý oblystyq sanıtarııalyq-epıdemıologııalyq baqylaý basqarmasy málimetinshe, zerthanalyq zertteýge as blogynyń 4 personalynan bakterııa tasymaldaýshylyqqa alynǵan synamadan, aýyz sýdan mıkrobıologııalyq jáne sanıtarııalyq-gıgıenalyq zertteýge alynǵan synamadan teris nátıje shyqty.

Sondaı-aq, mıkrobıologııalyq zertteýge daıyn tamaq ónimderinen 4 synama alynyp, bárinen oń nátıje anyqtaldy.

Mıkrobıologııalyq zertteýge 20 shaıyndy alynyp, onyń 2 synamasynan ishek toby taıaqshasy bakterııalary anyqtalsa, daıyn taǵam úlgilerin jáne olardyń qunaryn zertteýge 3 daıyn taǵam alynyp, nátıjesi teris shyqty.

Sonymen qatar, ettiń termııalyq óńdeýin tekserý úshin mamandar ashanadan daıyn etti alyp, nátıjesi etti óńdeýdiń standartqa saı ekenin kórsetti.

Taǵy da zerthanalyq zertteýge synama, mıkrobıologııalyq zertteýge patogendi mıkrofloraǵa shaıyndy alyndy.

Nátıjesi endi belgili bolady, tekserý áli de jalǵasyp jatyr.

Búgingi tańda Qabanbaı aýylyndaǵy mektepke deıingi mekemede 140 bala tárbıelenip jatyr.