Jetisý jerinen soǵysqa 120 myńnan astam jaýynger qatysqan
Uly Jeńis merekesi kúni myńnan astam taldyqorǵandyq maıdangerlerdi qurmetpen eske aldy. Dańq obelıskisine gúl shoqtaryn qoıýdan bastalǵan negizgi sharalar «Jastar» saıabaǵynda jalǵasty. Eń aldymen kórermenderge «Urpaqtar umytpaıtyn Uly Jeńis» atty teatrlandyrylǵan kórinis usynyldy. Onda soǵys bastalǵannan Jeńiske qol jetkizgenge deıingi aralyqtaǵy surapyl jyldardyń aýyr kezeńderi kórsetildi. Saıabaqta dástúrli «Dala ashanasy» qoıylyp, ardagerler jaýyngerlik botqadan dám tatty. Jınalǵan qaýymdy merekemen Almaty oblysy ákiminiń birinshi orynbasary Lazzat Turlashov quttyqtady.
«Búgin batyrlyq pen janqııarlyq erliktiń, birlik pen tatý tirliktiń merekesi - Uly Jeńiske 73 jyl tolyp otyr. Barshańyzdy osy aıtýly merekemen shyn júrekten quttyqtaımyn! Elbasymyz Nursultan Ábishuly Nazarbaev «Aǵa urpaqtyń jeńisi men búgingi bizdiń jetistigimiz - bir-birimen tyǵyz baılanysty. Eger aǵa býynnyń erligi bolmaǵanda, biz mundaı memleket qura almas edik», - dep erekshe atap kórsetti. Bul surapyl soǵysqa 1 mıllıon 800 myń qazaqstandyq attanyp, sonyń teń jartysy qan maıdannan qaıtpady. Búgin qasymyzda júrgen soǵys ardagerleri - bizdiń maqtanyshymyz. Olar Otan qorǵaý jolynda naǵyz patrıotızmniń úlgisin kórsetti. Aǵa býyn jastardy tárbıelep, elimizdiń ósip-órkendeýi úshin atsalysty. Ardagerlerge barynsha qamqorlyq jasaý - bizdiń qasıetti boryshymyz», - dedi L. Turlashov.
Sondaı-aq búgin «Taldyqorǵan» ıppodromynda merekege oraı ulttyq at sporty túrlerinen respýblıkalyq jarys ótip, keshkilik «Jastar» saıabaǵynda jastarǵa arnalǵan bı keshi men merekelik otshashý uıymdastyrylady.