Jetisý jerindegi «Tamshybulaq» týrısterdiń qyzyǵýshylyǵyn arttyrýda
Jergilikti turǵyndardyń aıtýynsha, dertke daýa, janǵa shıpa izdegender osy Tamshybulaqtyń sýyn iship, syrqatynan saýyǵyp jatady eken. Tipti bulaqtyń ár bir buryshynyń ózindik emi bar deıdi.
«Máselen, bulaqtyń ústingi jaǵy kóz aýrýyna óte paıdaly. Al endi bir buryshy baýyrǵa, búırekke, asqazanǵa jaqsy. Munda ásirese úlken kisiler keledi. Osy jerden bulaqtyń sýyn ishedi. Sonda emdik qasıeti júredi dep aıtady», - deıdi Qapal aýylyndaǵy mekteptiń muǵalimi Shynar Balatursynova.
Qaınar bulaqtyń erekshe ásemdigi Ulybrıtanııanyń áıgili saıahatshysy Tomas Atkınsondy da tańqaldyrǵan. Olar 1848 jyly Qazaqstanǵa kelip, jergilikti halyqtyń turmys-tirshiligi men salt-dástúrin zerttegen. Sol kezde qazaq jerinde dúnıege kelgen tuńǵysh uldarynyń esimin Alataý-Tamshybulaq dep qoıǵan. Búginde bul esim Anglııadaǵy úlken bir áýlettiń tegine aınalyp otyr. Al ótken jyly ǵana Atkınsonnyń urpaǵy Tamshybulaqqa arnaıy keldi. Sol kezde onyń urpaǵy bul jerge erekshe daıyndyqpen kelgenin jetkizgen.
«Bul jer Alataý-Tamshybulaq atamyzdyń ómirge kelgen jeri. Tamshybulaqtyń sulýlyǵy jaıly kóp estidik. Bul kúndi asyǵa kúttik. Tamshybulaqqa erekshe daıyndyqpen kelýdi uıǵardyq. Ústimizge arnaıy kıimdi kıdik. Maqsatymyz sol ýaqyttaǵy tarıhty eske túsirý», - degen edi T. Atkınsonnyń urpaǵy Stıv Braýn.
Esterińizge sala keteıik, Elbasynyń «Bolashaqqa baǵdar: rýhanı jańǵyrý» baǵdarlamalyq maqalasyndaǵy tapsyrmalardy oryndaý maqsatynda Almaty oblysynda birneshe ekspedıtsııa saparǵa shyqty. Solardyń biri otandyq BAQ ókilderi men blogerlerden qurylǵan top. Almaty oblystyq Іshki saıasat basqarmasy jáne oblystyq óńirlik kommýnıkatsııalar qyzmeti uıymdastyrǵan «Sakraldi Qazaqstan» atty top
Qoılyq jáne Saǵabúıen kóne qalashyqtarynda, Qapal aýylyndaǵy Tamshybulaq qaınarynda, aqyn Sara mýzeıi men kóne bilim ordasy Mamanııa mektebinde boldy.