«Jetisý jastary» baspana baǵdarlamasyna ótinim qabyldaý bastaldy

TALDYQORǴAN. QazAqparat - Baǵdarlamaǵa qatysý úshin Taldyqorǵan qalasynyń jasy 35-ten aspaǵan turǵyndary 10 jáne 28 shilde aralyǵynda Taldyqorǵan qalasy, Bolashaq shaǵynaýdany, 13 úı mekenjaıynda ótinim qaldyra alady.

Bıyl Jetisý oblysy ákimdigi men «Otbasy bank» arasynda 2023-2025 jyldarǵa arnalǵan «Jetisý jastary» baǵdarlamasyn iske asyrý boıynsha yntymaqtastyq týraly kelisim jasaldy.

Baǵdarlamaǵa 400 mln teńge qarajat bólindi.
​​Jobamen bıyl 40 jasty baspanamen qamtý josparlanǵan.

Joba Taldyqorǵan qalasynda turǵylyqty turatyn jastarǵa baspanaly bolý úshin jeńildetilgen sharttarmen ıpoteka alýǵa múmkindik beredi.

Byltyrǵy baǵdarlamanyń sharttaryna sáıkes jetim jáne ata-ana qamqorlyǵynan aıyrylǵan balalar rásimdeı alatyn bolsa, bıyl ózgerister engizilip, jalpy jasy 35-ke tolmaǵan Taldyqorǵan qalasynda jumys isteıtin, memlekettik turǵyn úı qorynan baspana alýǵa nemese jeke turǵyn úı qorynan jergilikti atqarýshy organ beretin jaldamaly turǵyn úı alýǵa esepte turǵan jastar qatysa alady.

Baǵdarlamaǵa qatysýshylardyń Taldyqorǵan qalasynda resmı jumys ótili ótinish bergen kezde sońǵy 12 aıdan kem bolmaýy tıis.

Tabysy da eskeriletin bolady. Otbasynyń árbir múshesi úshin ol 3,1 MP (125 758)aspaýǵa tıis.

Sondaı-aq, baǵdarlamaǵa qatysýshy men onyń otbasy músheleriniń sońǵy 5 jyl ishinde jyljymaıtyn múlki bolmaýy kerek.

Sonymen qatar qaryz somasy 10 000 000 teńgeden aspaýy tıis, al bastapqy jarna - bastapqy turǵyn úı úshin 0%, qaıta satý naryǵy - kepildik qamtamasyz etý jetkilikti bolǵan jaǵdaıda 10 %.

Turǵyn úı quny 10 mln. teńgeden asqan jaǵdaıda aıyrmany salymshy óz qarajaty esebinen tóleıdi.

Aıta ketetini, bıyl baǵdarlamanyń ekinshi legi josparlanyp otyr. Josparǵa sáıkes 50 jasty baspanamen qamtý maqsatynda 500 mln teńge bólinbek.