Jetisý prokýratýrasy turǵyndardyń shaǵymynan keıin ákimdiktiń zańsyz jer bergenin anyqtady

TALDYQORǴAN. QazAqparat - Taldyqorǵan turǵyndarynyń shaǵymynan keıin prokýratýra tekseris júrgizip, ákimdiktiń jer telimin zańsyz bergenin anyqtady, dep habarlaıdy QazAqparat tilshisi.

Taldyqorǵannyń Kıveleva kóshesindegi kópqabatty úı turǵyndary aýlasyna oıyn, fýtbol alańdary salynady dep kútken. Sózderinshe, ákimdik solaı ýáde bergen. Biraq jer telimi kásipkerge kópsalaly keshen salýǵa berilgen. Bul jaıt turǵyndardyń narazylyǵyn týǵyzyp, prokýratýra mán-jaıdy anyqtaýǵa kirisken.

«Aýdany 0,15 gektar jer ýchaskesiniń jeke tulǵaǵa konkýrstan tys berilýi Jer kodeksiniń 48-babynyń buzylýyna ákep soqqan jáne Taldyqorǵan qalasyn damytýdyń Bas josparyna qaıshy ekendigin anyqtady. Osyǵan oraı, 16-mamyrda Taldyqorǵan qalasynyń prokýratýrasy jergilikti atqarýshy organnyń atyna zańsyz shyǵarylǵan qaýlynyń kúshin joıý máselesin qoıyp, prokýrorlyq qadaǵalaý aktisin engizdi. Qadaǵalaý aktisiniń oryndalýy prokýratýranyń baqylaýynda»,- delingen Jetisý oblysy prokýratýrasy baspasóz qyzmetiniń habarlamasynda.