Jetisý ólkesinen Astanadaǵy jármeńkege 323 tonna ónim jetkizildi

TALDYQORǴAN. QazAqparat - Astanadaǵy Oqýshylar saraıynyń janynda Almaty oblysynyń aýyl sharýashylyǵy taýar óndirýshileriniń jármeńkesi ótýde. Jármeńkege oblystyń 15 aýdany men 3 qalasy qatysyp, astanalyq tutynýshylarǵa azyq-túliktiń 40-qa jýyq túrin usyndy, dep habarlady Almaty oblystyq ákimdiktiń baspasóz qyzmeti.

«Jármeńkege quny 160 mln teńge bolatyn 323 tonna aýyl sharýashylyǵy ónimderi jetkizildi. Atap aıtqanda, 7,0 tonna qus eti, 11,8 tonnaǵa jýyq balyq ónimderi,  92,4 tonna kókónis, 33,0 tonna alma, jemis-jıdekter, 49,6 tonna kartop, 3,6 tonna sút ónimderi, 7,0 tonna shubat pen qymyz,  6,5 tonna kúrish, 5,8 tonna un, 1,3 tonna bal, 16 myń danadan astam jumyrtqa, 2,4 tonna bakaleıa ónimderi  jáne  92,6 tonna basqa da ónim túrleri saýdaǵa shyǵaryldy», delingen habarlamada.