Jetisý oblysynyń turǵyny úıinde saqtaǵan balbaltasty Lepsidegi mýzeıge ótkizdi

TALDYQORǴAN. QazAqparat – Jetisý oblysy Alakól aýdany Lepsi aýylynda ornalasqan tarıhı murajaıǵa kelýshi týrısterdiń sany artty, dep habarlaıdy QazAqparat tilshisi.

Ótken jyly metsenattardyń kómegimen ashylǵan mýzeıge qyzyǵýshylyq tanytatyndar arasynda jergilikti turǵyndar ǵana emes, Germanııa, AQSh, Reseı jáne TMD elderinen keletin týrıster de kóp. Jyl basynan beri munda 2 myńǵa jýyq saıahatshy kelgen.

Búginde Lepsi murajaıynda 1 500-ge jýyq túrli eksponat tur. Bizdiń dáýirimizge deıingi V-III ǵasyrlarda ósirilgen kóne daqyldar men Túrki qaǵanaty dáýirindegi balbal tas, 1949 jylǵy patefondy da osy jerden kórýge bolady. Solardyń qataryndaǵy balbal tas buǵan deıin jergilikti turǵynnyń úıinde saqtalǵan. Ol tastyń tarıhı qundylyǵyn túsinip, ony mýzeıge ákelip qoıypty.

«1989 jyly kombaın júrgizdim. Alqap basynda bir úlken tas tehnıkanyń júrýine kedergi keltirdi. Ony bárimiz jabylyp alyp tastaıyq dedik. Kózim birden tastyń formasyna túsip, qyzyǵýshylyq týdyrdy. Tasty kótergende ony ejelgi túrki músini – balbal dep shamaladyq. Sondyqtan, ony dalaǵa tastamaı, úıge ákelip qoıdym. Endi mine, murajaı ashylǵannan keıin ol ekspozıtsııanyń ortasynan oıyp turyp oryn aldy. Bul – VII-VIII ǵasyrlardyń jádigeri. Osyndaǵy Kóktóbe taýynyń tómengi eteginen tabylǵan», - deıdi Muharam Haıbýllın.

Jalpy, Lepsi ólkesi tarıhı jádigerlerge toly. Aýyldyń ishinde, mańaıynda saq qorǵandary, balbal tastar kóp kezdesedi. Jaqyn jerdegi jartastarǵa qashalǵan kóne sýretter de tabylǵan.