Jetisý oblysynyń taýly aımaǵynda órt sóndirý jumysy áli jalǵasyp jatyr
20:22, 11 Qyrkúıek 2022
TALDYQORǴAN. QazAqparat – Jetisý oblysy Alakól aýdanyndaǵy «Dostyq» stantsııasyna jaqyn mańdaǵy órt sóndirý jumysy áli jalǵasyp jatyr, dep habarlaıdy QazAqparat tilshisi óńirdiń tótenshe jaǵdaılar departamentine silteme jasap.
Órt sóndirýshilerdiń jalynǵa qarsy kúresip jatqanyna búgin tórtinshi kún. Oblystyq tótenshe jaǵdaılar departamentiniń málimetinshe, taýly aımaqtaǵy «Kendir Saqal» ýchaskesine tik ushaqtarmen 84 tonna sý tógildi.
Búgin tańerteń órt oshaqtaryn anyqtaý úshin MI-171 tikushaǵymen komıssııalyq baqylaý júrgizildi. Shamamen 70 gektar aýmaqta 10 jerdiń byqsyp jatqany anyqtaldy.
Buǵan deıin habarlaǵanymyzdaı, órtti sóndirýge 232 adam, 2 tikushaq, 26 tehnıka, 60 aspaly búrikkish jáne 11 jylqy jumyldyryldy.