Jetisý oblysynyń ákimi Beıbit Isabaevtyń kandıdatýrasyn 106 depýtat qoldady
Depýtattar aldynda sóz sóılegen Álıhan Smaıylov Memleket basshysynyń Jarlyǵymen Jetisý oblysynyń qurylǵanyn eske salyp, óńir jurtshylyǵyn osynaý tarıhı oqıǵamen quttyqtady.
Úkimet basshysy depýtattarǵa QR Prezıdentiniń Jetisý oblysynyń ákimi laýazymyna Beıbit Isabaev pen Baǵdat Qarasaevtyń kandıdatýralaryn qaraýǵa engizý týraly hatyn oqyp berdi.
Álıhan Smaıylov olardyń árqaısysynyń óńirdi basqarý úshin tájirıbesi mol jáne uıymdastyrýshylyq qabiletteri jetkilikti ekenin atap ótti.
Ashyq daýys berý qorytyndysy boıynsha 141 depýtattyń 106-sy Beıbit Isabaevtyń kandıdatýrasyna, 35 depýtat Baǵdat Qarasaevqa daýys berdi.
Jıyn aıaqtalǵannan keıin QR Premer-Mınıstri óńir aktıvine oblys ákimin tanystyrdy.
Premer-Mınıstr óz sózinde oblys basshylyǵynyń aldynda memlekettik qyzmetter kórsetetin basqarý organdary men mekemeleriniń turaqty jumysyn qamtamasyz etýdi jedel túrde sheshý mindeti turǵanyn atap ótti.
Budan bólek, azamattardyń ál-aýqaty men ómir súrý sapasyn arttyrý úshin óńirdi ekonomıkalyq damytý boıynsha jumysty josparly túrde júrgizý qajet. Osy turǵyda Premer-Mınıstr aýyl sharýashylyǵy óndirisin, óńdeý ónerkásibin jáne týrızm salasyn keleshegi bar baǵyttar dep atady.
«Óńir ekonomıkasynyń myqty jaqtaryn taldap, Jetisýdyń jyldam damýyna serpin beretin ınvestıtsııalyq jobalardy anyqtaý qajet», - dedi Álıhan Smaıylov.
Sondaı-aq, Úkimet basshysy jergilikti turǵyndardyń ózekti áleýmettik máselelerin, sonyń ishinde sapaly aýyz sýmen, turǵyn úımen, elektrmen jáne gazben jabdyqtaýdy, joldar men qoǵamdyq nysandardy ýaqtyly jóndeýdi sheshýdiń mańyzdylyǵyn atap ótti.
«Óńir turǵyndarynyń áleýmettik máselelerin sheshý jergilikti atqarýshy organdar úshin birinshi orynda bolýy tıis. Bul oraıda olardyń jumysy halyqpen nátıjeli dıalog negizinde qurylyp, Memleket basshysynyń «Jańa Qazaqstan» saıasatyna sáıkes tapsyrmalaryn iske asyrýǵa baǵyttalýy tıis», - dep túıindedi Álıhan Smaıylov.