Jetisý oblysynyń ákimi álem chempıony atanǵan Ishar Qurbaevqa 1 mln teńgeniń sertıfıkatyn tabys etti
Óńir basshysy Beıbit Isabaevtyń aıtýynsha, Jetisý talanttarǵa baı ólke.
«Osydan jıyrma jyl buryn jerlesimiz Nurbaqyt Teńizbaev osy kúres túrinen jastar arasynda Álem chempıony boldy. Búgin onyń jolyn jalǵap, sen de álem jastary arasynda úzdik shyqtyń. Bul, birinshiden ózińniń kúsh-jigeriń men tynymsyz eńbegińniń arqasy, ekinshiden seni 7 jastan osy kúreske baýlyp, jattyqtyrǵan ákeńniń eńbeginiń jemisi. Sen tek óz áýletińdi, Jetisý óńirin ǵana emes, Qazaqstandy álemge tanyttyń. Endi eresekter arasynda top jaryp, Olımpıada shyńyna shyǵýyńa tilektespin. Sharshamaı-talmaı jattyǵyp, eńbekten. Biz saǵan barlyq jaǵynan qoldaý bildirýge ázirmiz, - dedi Beıbit Isabaev.
Jas sportshy ákimmen áńgimelesý barysynda Álem chempıonatynyń qalaı ótkenin aıtyp berdi. Sol sııaqty óziniń sporttyq joly, eń myqty qarsylastarmen beldesýden keıingi túıgen oılary, aldaǵy josparlary jaıly baıandady.
«Jastar arasynda Álem chempıony atanǵanym tek meniń ǵana emes, elimizdiń jeńisi dep bilemin. Alda josparlarym kóp. Olardyń bárine tynbaı jattyǵýdyń arqasynda jetemin dep oılaımyn», - dedi Ishar Qurbaev.
Jattyqtyrýshy Muhamet Nuǵymanov Ishardyń kelesi jyly eresekter arasynda beldesýge nıetti ekenin aıtty.
«Ishar qazir Almatydaǵy Sport jáne týrızm akademııasynda 3 kýrsta oqıdy. Jattyǵýǵa, úlken maqsattarǵa jetýge barlyq múmkindigi bar. Kórsetken qoldaýlaryńyz úshin alǵys aıtamyz», - deıdi ol.
Oblys ákimi sportshy men onyń jattyqtyrýshysyna Qurmet gramotasyn usynyp, chempıonǵa 1 mln teńgeniń sertıfıkatyn tabystady.
Buǵan deıin Iordanııa astanasy Amman qalasynda ótken kúres túrlerinen 20 jasqa deıingi jastar arasyndaǵy álem chempıonatynda grek-rım kúresinen Ishar Kýrbaev jeńimpaz atanǵany týraly jazǵan bolatynbyz.
Jetisý oblysynyń ókili 55 keli salmaqta fınalda ázerbaıjandyq Farıd Sadıhlımen synǵa tústi. Beldesý barysynda jınaqy qımyl kórsetti. Nátıjesinde qarsylasynan 5:1 esebimen basym túsip, álem chempıony atandy.
Ishar alǵashqy beldesýinde túrik Emre Mýtlýdan, odan keıin túrkimen Abdývalı Rahımbaevtan basym tústi. Al jartylaı fınalda qyrǵyz Nýrıston Sýıorkýlovty jeńdi.
Eske salsaq, Ishar Muhametuly Qurbaev 7 jastan bastap grek-rım kúresinmen shuǵyldanady. Ákesi Nuǵmanov Muhamet jeke bapkeri. Ishar Muhametuly grek-rım kúresinen Qazaqstan Respýblıkasynyń sport sheberi.
2018-2019 jylǵy kadetter arasynda Álem jáne eki dúrkin Azııa chempıony. 2023 jyly eresekter arasynda grek-rım kúresinen Qazaqstan Respýblıkasynyń chempıony.
Sondaı-aq, 2023 jylǵy aqpan aıynda ótken Qazaqstan respýblıkasynyń VI jazǵy spartakıadasynyń kúmis júldegeri. Jýyrda Iordanııanyń Amman qalasynda grek-rım kúresinen jastar arasynda ótken Álem Chempıonatynda Álem chempıony atandy.
Aıta ketsek, qazaqstandyq balýandar sońǵy ret atalǵan jastaǵy sportshylar arasyndaǵy álem chempıonatynda jeti jyl buryn jeńis tuǵyrynan kóringen edi.