Jetisý oblysynyń ákimdigi jarty mıllıard teńgege jýyq qarjyǵa kólik almaq

TALDYQORǴAN. QazAqparat - Jetisý oblysynyń ákimdigi 469 mıllıon teńgege 28 kólik satyp alý úshin tender jarııalady. Ár kóliktiń baǵasyn 16 mln 750 myń teńgege belgilegen, - dep habarlaıdy QazAqparat tilshisi.

«Jetisý oblysynyń basqarmalarynda kólikter bar. Biraq eski. Sonymen qatar keıbir basqarmalarda avtokólik múldem joq. Mysalǵa týrızm, jer, taǵy bir eki basqarmada kólik joq»,- dedi Jetisý oblysy ákimdigi apparaty qarjy sharýashylyq bóliminiń basshysy Talap Shaýharov.

Jalpy Jetisý oblysynyń ákimdiginde 23 basqarma bar. Onyń tek úsheýinde ǵana avtokólik joq. Biraq Jetisý oblysynyń ákimdigi birden 23 basqarmanyń barlyǵyna, odan bólek máslıhatqa, ákim apparatyna jańa temir tulpar almaq. Qazir osy 28 kólikti satyp alý úshin 469 mıllıon teńgege tender jarııalaǵan. Ondaǵy árbir kóliktiń baǵasy 16 mıllıon 750 myń teńgege belgilengen.

Al Parlament májilisiniń depýtaty Qaraqat Ábdenniń aıtýynsha, eldegi memlekettik qyzmetkerler qyzmettik kólikterinen túsip, astanalyq sheneýnikter sııaqty taksıge miný kerek. Sonda bıýdjet shyǵyny bes esege deıin azaıady. Jáne bul álemdik tájirıbede de bar.

Depýtattyń sózinshe, qazir qajet emes shyǵyndardy qysqartyp, únemdeý tásilderin engizgen durys. Jyl saıyn qymbat kólikterdi almastyryp, jańartyp satyp alý, júrgizýshilerge aı saıyn jalaqy tóleý, ári kólikterdiń kútimi men salyǵyna, jóndeý jumystary ketetin aqsha — úlken shyǵyn.

Sondaı-aq, depýtat eger ákimdik rasymen de kólikke muqtaj bolsa, qoljetimdi, qymbat emes ári otandyq óndirýshilerdiń kólikterin tańdaǵan jón ekenin aıtty.

Aıta ketsek, jýyqta Prezıdenttiń ózi de sheneýnikterge halyqtyń jaǵdaıyn bilý úshin kólikterinen túsip, jaıaý júrýge keńes bergen edi.