Jetisý oblysynyń ákimdigi kúzge qaraı basqa ǵımaratqa kóshedi
Jýrnalısterdiń suraqtaryna jaýap berý barysynda Beıbit Isabaev Memleket basshysynyń tapsyrmasyna sáıkes eń aldymen halyqtyń turmys jaǵdaıyna, densaýlyǵyna, laıyqty tabys tabýyna, jumyspen qamtamasyz etilýine basty nazar aýdarylatynyn jetkizdi. «Ekinshi, ádildik prıntsıpi. Zańnyń barshaǵa ortaq bolýyn, zańnyń basymdyǵyn qamtamasyz etýimiz kerek. Áleýmettik ádiletsizdik bolmaýy kerek, áleýmettik ádilettilik prıntsıpin saqtaýymyz kerek», - dedi oblys ákimi medıtsına mamandaryn kásibı merekesine arnalǵan saltanatty sharada.
Sol sııaqty tabıǵaty kórkem, sýy mol óńirde aýyl sharýashylyǵy, óńdeý óndirisi, týrızm salalaryn damytýǵa, aımaqqa jańa ınvestorlar tartýǵa basymdyq berý kerek dep topshylaıtynyn aıtty.
Sonymen birge ol Jetisý oblysy ákimdiginiń ýaqytsha ornalasý orny týraly alypqashpa sózderge núkte qoıdy.
«Jańa Jetisý oblysy ákimdiginiń Saltanat saraıynda ornalasýyn qalamadym. Saltanat saraıy - bul halyqqa qajetti nysan, jastar neke qııatyn oryn. Ol jumys isteýi kerek, halyqqa qyzmet etýi kerek. Jastardyń jolyna bóget bolýǵa bizdiń qaqymyz joq. Sondyqtan biz Taldyqorǵan qalalyq ákimdigi ǵımaratyna ýaqytsha ornalastyq. Oblys ákimdiginiń órtengen ǵımaraty qalpyna keltirilgennen keıin biz kúzge qaraı sol ornymyzǵa kóshemiz dep oılaımyn», - dedi Jetisý oblysynyń ákimi Beıbit Isabaev.
Budan buryn habarlanǵandaı, Prezıdent Jarlyǵymen Abaı, Jetisý jáne Ulytaý oblystary quryldy. Jetisý oblysynyń ákimi bolyp Beıbit Isabaev taǵaıyndaldy.