Jetisý oblysyndaǵy taýly aımaq órtenip jatyr

TALDYQORǴAN. QazAqparat - Jetisý oblysy Alakól aýdanyndaǵy Dostyq stantsııasy mańynda qurǵaq shóp pen butalar órtenip jatyr, dep habarlaıdy QazAqparat tilshisi.

Oblystyq Tótenshe jaǵdaılar departamentiniń málimetinshe, órt týraly habarlama 8 qyrkúıek kúni saǵat 04:30-da túsken. Oqıǵa ornyna dereý órt sóndirýshiler jóneltildi.

Órt sóndirý brıgadasy kelgen kezde memlekettik ulttyq tabıǵı parki «Kendir saqal» orman sharýashylyǵyndaǵy shyqqan órttiń jalpy aýdany 60 gektarǵa jetti. Onda qurǵaq shóp pen butalar órtenýde.

«Órttiń qylqan japyraqty ormanǵa taralý qaýpi bar. Dala órtin sóndirý boıynsha yntymaqtastyq josparyna sáıkes oblys departamentine Alakól orman sharýashylyǵynyń, jergilikti atqarýshy organdardyń kúshteri men quraldary jáne QR UQK shekara qyzmetiniń áskerı qyzmetkerleri tartyldy. Taldyqorǵan qalasynan Tótenshe jaǵdaılar departamentiniń qosymsha jeke quramy – 45 qyzmetker men 5 tehnıka jiberildi. Órt oshaǵyna deıingi qashyqtyq 490 shaqyrymdy quraıdy», - delingen habarlamada.

«Tańǵy málimet boıynsha órttiń jalpy aýmaǵy boljam boıynsha 200 gektardy quraıdy. Órt sóndirý jergilikti jerdiń taýly bolýyna, sekýndyna 20 metrge deıin soqqan jel ekpini men meteojaǵdaıǵa baılanysty kúrdelendi», - dep atap ótti vedomstvodan.

Órt sóndirýge 173 adam, 1 tikushaq, 16 tehnıka, 70 aspaly búrikkish jáne 6 jylqy jumyldyrylǵan. Qaza bolǵandar men zardap shekkender joq.

Foto: instagram.com/kris_p_tdk