Jetisý oblysyndaǵy «Saryózek-Kóktal» avtojolynyń jóndeý jumysy baıaý júrip jatyr

TALDYQORǴAN. QazAqparat - «Saryózek-Kóktal» baǵytyndaǵy avtokólik jolynyń 45-68 shaqyrymynda 2021 jyldyń maýsym aıynan bastap kúrdeli jóndeý jumystary júrgizilýde. Quny 10,2 mlrd teńgeni quraıtyn jóndeý jumystary jospar boıynsha osy jyly aıaqtalýy tıis bolǵan. Alaıda jumys qarqyny baıaý júrip jatyr, dep habarlaıdy QazAqparat Jetisý oblystyq máslıhatynyń baspasóz qyzmetine silteme jasap.

Osyǵan oraı Jetisý oblysyna jumys saparymen kelgen Senat depýtattary Ǵalıasqar Sarybaev, Amangeldi Tólemisov pen oblystyq máslıhat depýtattary, qoǵamdyq keńes músheleri bolyp merdiger kompanııalardyń ózine júktelgen mindettemeni ne sebepti kesheýildetip otyrǵanyn bilý úshin Altynemel asýyna arnaıy bardy.

Jol qurylysyn aralaýda «QazAvtoJol» UQ AQ basqarmasynyń Almaty oblysy boıynsha fılıalynyń dırektory Nurhat Aqyltaev jumys barysyn túsindirdi. Óz kezeginde ol «Saryózek-Kóktal» avtojolynyń 45-68 shaqyrym ýchaskesiniń kúrdeli jóndeýi men «Kóktal-Jarkent» jolyndaǵy 16 shaqyrymnyń ortasha jóndeý jumysy bıyl, al tolyqqandy jóndeý jumysy kelesi jyly aıaqtalatynyn aıtty.

Onyń sózinshe, 2024 jyldyń 25 qazany — Respýblıka kúni qarsańynda «Saryózek-Kóktal» baǵytyndaǵy avtokólik joly halyq qoldanysyna tolyǵymen beriledi.