Jetisý oblysyndaǵy kedendik bekette bir mıllıard teńgeniń kontrabandalyq júgi tárkilendi
«Altynkól-Jol» keden beketinde, Qytaı Halyq Respýblıkasynan Reseı Federatsııasyna tranzıt protsedýrasy negizinde bara jatqan konteınerlik poıyzǵa keden zańnamalaryn buzǵan degen kúdik týyp, 6 temirjol konteınerine ınspektsııalyq tekserý kesheni arqyly skanerlik ádispen kedendik tekserip-qaraý jumysy júrgizildi. Nátıjesinde, atalmysh konteınerlerden kóliktik-ilespe qujattarynda durys málimdelmegen, salmaǵy 137 tonna, kedendik quny 1 mıllıard teńgeden asatyn halyqtyq tutyný taýarlary tabyldy. Mysaly, taýardyń kóliktik-ilespe qujattarynda taýardyń aty «mata» dep kórsetilgen. Alaıda, kedendik tekserý barysynda djınsı, shalbar, kúrteshe, teri ton, beldemshe, pıjama, ártúrli áıelder kıimi, t.b. kedendik-salyqtyq tólem quny joǵary taýarlar shyqty. Bul jerde ótirik málimdelgen mata taýary salyqtyq alym koeffıtsıenti tómen taýarlardyń qataryna jatatyn bolǵandyqtan, taýar ıesiniń kedendik tólemder men salyqtardy naqtyly tóleýdan jaltarý maqsatyn kózdegenin baıqatady», -dedi «Altynkól-jol» keden beketiniń bas mamany Beken Nurahmetov.
Qazirgi ýaqytta «Altynkól-jol» keden beketiniń basshylyǵy tarapynan jınaqtalǵan atalmysh is materıaldaryn qylmystyq-protsessýaldyq sheshim qabyldaý úshin Jetisý oblystyq ekonomıkalyq tergeý departamentine jiberý máselesi qarastyrylýda.