Jetisý oblysynda júgeri sirnesinen qant óndirý usynyldy

JARKENT. QazAqparat - Jetisý oblysynyń Panfılov aýdanyndaǵy Jarkent krahmal-sirne zaýyty qantqa degen qajettiliktiń bir bóligin júgeri shárbatymen óteýdi usynyp otyr, dep habarlaıdy QazAqparat tilshisi oblys ákiminiń baspasóz qyzmetine silteme jasap.

Óıtkeni, bul daqyldyń quramynda 75%-ke deıin qant bar. Sondyqtan, ónimdi óndiristik maqsatta, ıaǵnı, tabıǵı qant almastyrǵysh retinde paıdalanýǵa bolady.

Osy rette Jarkent krahmal-sirne zaýyty elimizdegi iri kondıterlik fabrıkalar men sýsyn shyǵaratyn zaýyttardy qajetti ónimmen qamtamasyz etip otyr.

Jylyna 75 myń tonna júgeri sirnesin daıyndaıdy. Aldaǵy ýaqytta qýatyn eki ese ulǵaıtqaly otyr.

Óńirge jumys saparymen barǵan oblys ákimi Beıbit Isabaev osy baǵyttaǵy joba-josparlarmen tanysty.

«Máselen, elimizde qant tutyný kólemi 550 myń tonna bolsa, sonyń jartysy - óndiristik suranys. Bul qajettiliktiń negizgi bóligin Jarkent krahmal-sirne zaýyty óteýge qaýqarly. Ol úshin jańa jeli ashyp, kásiporyndy keńeıtý kózdelip otyr. Qazir zaýyt jylyna 120 myń tonna júgerini 97 paıyzǵa deıin tereńdetip óńdep, 28 túrli ónim shyǵarýda. Kásiporyndy keńeıtý aıasynda 200 myń tonnaǵa deıin júgeri qabyldaý josparda bar»,- delingen vedomstvonyń habarlamasynda.

Bul rette oblys ákimi sharýalardy yntalandyrý kerektigin alǵa tartty.

Sonymen qatar, irgeles ornalasqan, polıpropılen qap shyǵaratyn «Ýnıversal» kásipornynda boldy. Onda jylyna 50 mln shamasynda qap shyǵarylady.

Zaýyt búginde irkilissiz jumys istep tur.