Jetisý oblysynda zańsyz jumys istegen 170 sheteldik jaýapqa tartyldy
Jetisý oblysynyń polıtseıleri «Zańsyz kelýshi» profılaktıkalyq is-sharasynyń aıasynda kóshi-qon zańnamasy boıynsha buzýshylyqtardy anyqtaýdy kúsheıtti. Úsh kún ishinde oblysta 243 adam jaýapqa tartyldy, onyń ishinde 170 sheteldik azamat bar.
Tekeli qalasyndaǵy qurylys obektilerdiń birinde júrgizilgen reıd barysynda kórshi memlekettiń 15 azamatynan turatyn top ustaldy. Sheteldikterdiń eshqaısysy eńbek qyzmetin júzege asyrýǵa qandaı da bir ruqsat qujatty kórsete almady. Osyǵan baılanysty árbir ustalǵanǵa qatysty jınaqtalǵan materıaldar sottyń qaraýyna jiberildi.
Tıisinshe sot tártip buzýshylarǵa jaza qoldaný nemese elden shyǵarý týraly sheshim qabyldaýy kerek. Olardy jumysqa qabyldaǵan 37 jastaǵy azamatqa aıyppul salyndy.
«Sot sheshimimen kóshi-qon zańnamasyn buzǵany úshin 7 shetel azamaty elden shyǵaryldy. Jeke basyn anyqtaý men rastaýǵa qatysty qujattarynyń joq bolýyna jáne taǵy da basqa máselelerge baılanysty 47 sheteldik azamat qabyldaý-bólý pýnktine ornalastyryldy. Jergilikti turǵyndardyń birine zańsyz kóshi-qondy uıymdastyrdy degen kúdik boıynsha qylmystyq is qozǵaldy», – dedi kóshi-qon qyzmeti basqarmasynyń bastyǵy Erlan Raıymbekov.