Jetisý oblysynda tumaýdyń aldyn alý jumystary júrip jatyr

TALDYQORǴAN. QazAqparat - Jetisý oblysy boıynsha jergilikti bıýdjetten bólingen qarjyǵa 400 dana mólsherde tumaýǵa qarsy vaktsına satyp alyndy, - dep habarlaıdy QazAqparat tilshisi.

«Oblys boıynsha tumaýǵa qarsy ımmýndaý jumystary 2022 jyldyń 3-shi qazanynan bastaldy. Búgingi kúnge deıin 16 781 adam egildi, onyń ishinde 14 jasqa deıingi balalar – 2 328 (13,8%). Jalpy halyq sanyna shaqqandaǵy úlestik kórsetkish 2,5% qurady. DDU málimetine sáıkes aldaǵy epıdemııalyq maýsymda A (H1N1) pdm09, A (H3N2) jáne tumaýdyń V vırýsy bolady dep boljanýda»,- delingen Jetisý oblystyq sanıtarııalyq-epıdemıologııalyq baqylaý departamenti baspasóz qyzmetiniń habarlamasynda.

Jalpy oblys boıynsha turǵyndardyń 14% qamtý josparlanyp otyr.

Epıdemııalyq maýsym aldynda jyl saıyn tumaýǵa qarsy aqysyz egý - medıtsına qyzmetkerleri, medıtsınalyq uıymdarda medıtsınalyq baqylaýǵa jatatyn balalar, alty aıdan asqan kóp aýyratyn balalar, jetim balalar men ata-anasynyń qamqorlyǵynsyz qalǵan balalarǵa arnalǵan bilim berý uıymdary, sábıler úıleri balalary, medıtsınalyq-áleýmettik mekemelerdiń (uıymdardyń) qyzmet alýshylary, júktiliktiń ekinshi nemese úshinshi trımestrindegi júkti áıelder, júrek–qantamyr júıesiniń jáne tynys alý músheleriniń sozylmaly aýrýlary bar jáne epıdemıologııalyq kórsetimderi bar turǵyndarǵa júrgiziledi.